Минскалда гьаб сагIаталда байбихьулеб буго Алманиялъул, Франциялъул, Россиялъул ва Украиналъул лидеразул данделъи. Ангела Меркелил, Франсуа Олландил, Владимир Путинил ва Пётр Порошенкол мурад ккола Донбассалда бугеб конфликт рагIалде бахъинабиялъе нухал рати.
Данделъиялда цебе Меркелил пресс-секретарь- Штеффен Зайбертица лъазабуна жиндир ракI чIун гьечIин гьеб данделъиялъ лъикIал хIасилал кьезе рукIиналдайин. Минскалда кIалъа-ралъаял тIоритIулел рукIиналъ «гьитIинабго хьул бижинабулеб буго, амма гьелдаса тIокIаб жо» гьениса щвезе бугебищали жинда лъаларин абун буго Зайбертица.
Украиналъул къватIисел ишазул министр Павел Климкиница лъазабуна гьел кIалъа-ралъаязда Киевалъул аслияб масъала бугин Минскалъул къотIиял тIуразаризе Москваялъул хIадурлъи букIинаби ва хIакъикъаталдаги кьвагьиги чIезабун, рагъул бакIаб техникаги нахъе бачун, Россиялъулгун Украиналъул гъурхъабазда тIад контроль Киевалъухъе жиндихъего тIадбуссинабиян.