Москваялъул Басманный диванханаялъ 13 маялде щвезегIан халатбахъинабун буго Украиналдаса йоржарухъан Надежда Савченко жаний тIамизе йигеб болжал. Гьелда гIунтIизабулеб буго Россиялдаса журналистал чIваялъулъ гIахьаллъи букIиналъул гIайиб. Гьелъул адвокатаз диванханаялда гьарулеб букIун буго Савченко цоги бокьараб шартI бихьизабун диваналъул заман щвезегIан туснахъалъуса йиччайин. Гьезул пикруялда, гьанжеялде кIиго моцIалъ ракъи лъазабун йигей Савченко 13 май щвезегIан чIаго хутIичIого йикIине рес буго.
Савченкол адвокат Марк Фейгиница лъазабулеб букIана гьелъул ишалъул хал гьабулаго ричIчIаралщинал гъалатIазул. Гьесул пикруялда, цониги документалда гьечIо гьелъул гIайиб бихьизабулеб далил ва гьей жаний тIамун йиго къанунги хвезабун.
ЦIех-рехчагIазул пикруялда, Савченкоца араб соналъул июлалда Луганскалда гъоркьехун Украиналъул аскариязде малъулеб букIун буго кибехун кьвагьизе кколебали ва гьеб мехалда хун вуго Россиялдаса кIиго журналист. Гьез гьединго абулеб буго Савченкоца Россиялъул гIурхъи бахун бугин къанунги хвезабунин. Савченкол рахъалъ абулеб буго гьей сепаратистаз йикъизеги йикъун Россиялъул рахъалде жидецаго ячанин ва Луганскалда бицен гьабулеб кьвагьи букIараб къоялде гьей асирлъуда йикIанин.