Косовоялда анцI-анцI чи лъукъун вуго 27 январалда полициязда ва демонстрантазда гьоркьоб букIараб тунка-гIусиялда. Протесталъул акциялде рахъараз тIалаб гьабулеб букIана албанал хIакъир гьарурав сербазул министр хъулухъалдаса вахъизе.
Полициялъ Приштина бакьулъ хIукуматалъул минабазда цере рукIарал акциячагIазде данде хIалтIизабун буго магIу бачIинабулеб газ. Лъукъаразда гьоркьов вуго щуго полициявги.
ХIалтIул ва социалиял суалазда сверун министр Александр Ябланович нахъе рехейин гьарулел протестазул ахирисеблъун букIана гьел тунка-гIусиял ккараб. Ябланович вуго премьер-министр ГIиса МустIафал хIукуматалда лъабго вугев этникиял сербазул цояв.
Гьес чанго анкь цебе Косовоялда ГIиса авараг гьавиялъул байрам кIодо гьабун жинсияб килисаялде (монастыралде) унел рукIарал сербал гьенире риччачIел албаназде «жанаваралин» абун букIун буго. Гьел риччачIел албаназ абулеб букIана гьезда гьоркьор рагъулал такъсирчагIи рукIанин. Гьелдаса хадуб Яблановичас тIасалъугьин гьарун букIун буго.