Автомобиль бачине изну гьечIел гIадамазда гьоркьор гьеб сияхIалда руго лъай-гIакълуялъул рахъалъ нахъе ккарал, эпилепсия, шизофрения, наркомания абураб унти жидеда бугел ва канлъуклъи бугелги чагIи. Гьединго гьеб сияхIалда буго балугълъиялда ригьалда щведал инсанасул гIамал-тIабигIат хиси абурабги бутIа. Гьеб бутIаялда гъорлъе унел гIадамал кколел руго эксгибиционистал, трансвеститал, гIисин лъималазда зулму-хIал гьабулел гIадамал. Гьединго квешаб тIабигIат-гIамалалде ругьунлъулел гIадамалги, клептоманал, пироманал ва гьел гурелги. Эксгибиционистал гьел ккола жидерго черхалъул бихьизабизе гьукъараб лага, гIаврат халкъалда рагьун бихьизабулел гIадамал. Клептоманал ккола цIогьодизе бугеб къасд рехун тезе кIоларел гIадамал. ХIасил-калам квешаб гIамалалде ругьунлъарал чагIи.
Россиялъул хIукуматалъ 8 январалда тасдикъ гьабураб документалда гьеб тайпаялъул гIузру бугел гIадамазул бутIа цIар-цIарккун рехсон гьечIо. Балугълъиялъул ригьалда шведал гIадамасул гIамал-тIабигIат хиси абураб бутIаялда гъорлъе унин гьел киналго чагIиян баян гьабулеб буго инсанасул ихтиярал цIуниялъул рахъалъ, Россиялъул Президентасда цебе гIуцIараб Шураялъул вакил Елена Масюкица. Амма гьел киналго чагIи гьеб сияхIалде гъорлъе рачин битIун гьечIин, дунялалъулго къануналъулаб практикаялда кин бугебалиги балагьун цIидасан хIадуризе кколин гьеб документилан абулеб буго гьелъ.
ХIакъикъаталдаги бегьунгутIи бугиш гьел гIадамазе автомобиль бачине риччазе бегьуларин абураб хIукму ва лъида гьел тIаде балагьун ратIа рахъизе лъалел абураб суал бижулеб буго гьениб. Гьеб суалалда тIасан жиндирго пикру «Эркенлъи» радиоялъе загьир гьабуна Липецк шагьаралъул азарханаялда тохтурлъун хIалтIулев вугев, Гъуниб мухъалдаса Шамхалов Шамилица.
ТIадехун рехсарал гIузрабазул цонигияб бугиш гьел бицен гьабулеб гIадамазулали лъазе, автомобиль бачине ихтияр кьолеб документ кьолаго хал гьабуел хасал тохтурзабазул комиссия букIонин абулеб буго Шамилица. Амма трансвеститал абулеб гIадамазе автомобиль бачине гьукъизе кколин абураб пикруялъул тIубанго рахъкколеб гьечIо гьесги.
Шамхалов Шамиль: «Автомобиль бачине гьезул щиб къварилъи бугеб? Дир хIисабалда ботIролъан гIунгутIи бугел гIадамазе кьезе бегьуларо автомобиль бачине ихтияр. Гьекъолдухъабазеги, наркоманазеги, гьезда релъараб къавмалъеги. Амма нилъер гьаниб гIала-гъважа буго гьелда сверухъ. ГIарац кьуни бокьарав чиясе кьола изну автомобиль бачине. Хасго Дагъистаналда».
Гъуниб мухъалъул аслияб азарханаялдаса тохтур-психиатр Мусаев Мусаца абуни рикIкIунеб буго Россиялъул хIукуматалъ тасдикъ гьабураб документалда эпилепсиялъ, наркоманиялъ унтаралги, канлъукълъи ва цогидалги гIузраби ругел гIадамал гурони, трансвеститал ва гьезда релълъарал, тIадехун бицен гьабулеб тайпаялъул гIадамал хас гьабун ресхон гьечIин. Инсанасул ихтияр цIунелез ургъунго ахIи-хIур бахъинабизе къваригIиндал жидецаго баян гьарун ругин гьел чагIи.
Муса Мусаев: «ХIукуматалъул нухмалъиялда ругел чагIиги гIабдалзаби гурелъул, гьел бицен гьабулел чагIазе автомобиль бачине изну кьечIого тезе. Гьениб щибниги гIунгутIи гьечIолъи лъала гьездаги»
Тохтурас халги гьабун кьезе бегьуларин гьесие изнуян хIукмуги гьабун хъвараб кагъат бугони батIияб иш бугин, гурони гIамал-тIабигIаталъул рахъалъ кинаб хиса-баси бугев чи гьев вугевали кинанин лъалеб тIаде балагьунилан абуна «Эркенлъи» радиоялъе Инсанасул ихтиярал цIунулеб «Мемориал» гIуцIиялда хIалтIулей йикIарай адвокат Елена Денисенкоцаги.
Амма нижергун гара-чIвари гьабурал тохтурзабаз хадуб тIаде жубана Россиялъул хIукуматалъ изну кьечIониги щибин, къанунияб куцалда гьеб хIукму рагIа-ракьанде щун тIубазабулареб мехалда. Бокьарав тохтурасе пуланаб къадар гIарцул кьуни гьес берал къанщулин бицен гьабулеб гIузру бугел гIадамазе автомобиль бачине изну кьолелъул.