БатIи-батIиял машгьурал дагъистнаияз цIияб соналдехун бусурбабазул бугеб бербалагьи бицунеб ва гьеб какулеб видео интернеталда тIибитIизабурав НурмухIамадов Мурад ккун вуго МахIачхъалаялда. Гьев кквеялъе гIиллаги ккун буго гьесухъ кодоб кьвагьулеб алат бати. Гьедин баян гьабулеб Жанисел ишазул министелъиялъул пресс-хъулухъалъ.
31 декабралда Мурад къваригIелаз шагьаралде вахъанила, гьесул тIуразе гIемер суалал рукIанин гьеб къолъ: азарханаялде ине, хIалтIуде инейин баян гьабулеб буго гьесул хъизам Наиляца. Бакъанидехун кIалъайдал, телефон борхуларого букIун жий щаклъанила щиб букIаниги ккун батизе рес букIиналда.
Къаси лъанила гьев шагьаралъул Советский мухъалъул жанисел ишазул бутIаялда ккун вукIин. МахIачхъалаялда Родопский бульвар бугеб бакIалда низам цIунулез хал-шал гьабизе чIезавидал гьесухъ граната бати ккун буго гьев кквеялъе гIилла.
Амма жинда лъаларила сунда хурхун гьев ккуравали ва кисан гьесухъе гьеб кьвагьулеб алат ккарабалий баян гьабулеб буго Наиляца. Гьев киналгIаги полициялъулгун ричIчIунгутIиял ругел, яги гьезул сияхIалда вугев чи вукIинчIила. Гьесухъе граната рехун букIиналдаги щаклъи кколарилан баян гьабулеб буго чIужуялъ.
Нахъияб къоялъ низамцIунулел рачIун руго НурмухIамадовасул рокъореги. Гьениб низамцIунез чIухь балаго батун буго ярагъ ва жеги кьвагьулеб алат.
Гьеб ярагъги рехараб бугила жидер рокъобе, жал гIумру гьабун ругеб бакIалде рачIарал низамцIунулезда цадахъго рачIарал рукIанила чIухь балеб мехалъ рукIунел нугIзал, гьезда киназдаго хадуб халкквезе рес букIинчIила, заманалдаса бахъун бачIанила ярагъ бугеб къвачIа, гьеб лахIзаталъ лъагIан жинда бихьичIеб.
ГьабсагIат НурмухIамадов заманалъул туснахъалда вугин лъазабулеб буго гьесл адвокат Зиявудин Увайсовас. Мурад жинда вихьиналила ва гьесдехун щибго хIал-зулму гьабун гьечIила. Мурад низамцIунулез кквеялъул гьадин баян гьабуна адвокатас «Эркенлъи» радиоялъе.
Зиявудин Увайсов: « Дида НурмухIамадов вихьизе тана, абизе ккола кинабгIаги хIал-зулму гьесдехун гьабун гьечIо. 31 къоялъ маршуткаялда рекIун унаго гьев низамцIунулез гьениса къватIиве вахъинавун вуго. Цинги жидедаго цадахъ Родопский бульвар бугеб бакIалде вачун, гьениб чIухь бан буго гьесухъ. ЧIухь балаго гьесул кодолъиялда гьркьоб граната батун буго ва Советский мухъалъул жанисел ишазул бутIаялде вачун вуго.
1 январалъ гьесул рокъоб бараб чIухьалъул хIасилалда батарабилан абулебги буго ярагъ. ГьабсагIат НурмухIамадовасде гIайиб гIунтIизабулеб буго изну гьечIого ярагъ цIуниялда бан».
НурмухIамадов ккведал гьесул кверал скотчалъ рухьун руго, ва беразде тIагъурги цIан, кодоб цо жо лъун буго, амма щиб гьебали ккурасда бичIчIун гьечIила, хадуб батараб гранатаялда гьесул килщазул лъалкIал ратидал бичIчIун бугила гесда гьебин баян гьабуна адвокатас.
ГьабсагIат НурмухIамадов хIалтIулев вугила программистлъунин баян гьабулеб буго гьесул хъизамалъ, гьелдаса цеве НурмухIамадов хIалтIулев вукIана «Черновик» газеталда. Гьединго НурмухIамадовасул гьабулеб букIана жамгIияб хIаракатчилъиги.
Аслияб гIиллалъун НурмухIамадов кквеялъе батизе рес бугин гьес интернеталда лъураб, ЦIияб сон какулеб видеойилан рикIкIунеб буго жиндир цIар абизе бокьичIев блогерас.
«Дагъистаниязул ЦIияб соналдехун бугеб бербалагьи» абураб видеоялъухъ интернеталда валагьун вуго 150 азаргоялдсаса цIикIкIун чи. Гьеб видеолда диниял хIаракатчагIаз, жамгIиял хIаракатчагIаз ва спорталда машгьурал гIадамаз цIияб сон кIодо гьабиялдаса инкар гьабизе ахIулел руго дагъистаниял.
Абизе ккола, цIияб сон байрам гьабиялда сверухъ ахирал саназ тIолго Шималияб Кавказалда унел ругин гIемер бахIсал.РухIиял церехъабаз ва жамгIияталъул цо бутIаялъ ахIулел руго гьеб байрамлъун рикIкIиналдаса инкар гьабизе. Талъиялъ ва светияб жамгIияталъул гIадамаз гьеб байрамалъул рахъ кколеб буго.
Гьелдаго цадахъ байрамкъояз хIинкъи буго изну гьечIого яргъидгIуцIцIаразул рахъалдасан такъсириял ишал рукIиналдеги. Гьелда хурхун низамцIунулез ва полициялъулаз гIодоркъояз кIваркьураб хIалтIи гьабулеб буго ва гьезул къадар цIикIкIинабун буго.