Цолъарал Штатазул финансабазул министерлъиялъ «Магнитскиясул сияхIалде» гъорлъе Россиялъул жеги ункъго гражданин жуван вуго: Чачан Республикаялъул жанисел ищазул министр хисулев Апти Алаудинов, гьебго республикаялъул бетIерасул ва хIукуматалъул администрациялъул нухмалъулев МухIамад Давудов, Россиялъул Генералияв прокурор хисулев Виктор Гриня ва ЦIех-рех гьабулеб Россиялъул комитеталъул хIалтIухъан Андрей Стрижов.
Гьел гIайибияллъун рикIкIун руго инсанасул ихтиярал хвезариялда бан. Гъозие гьукъун буго Цолъарал Штатазде сапар бухьизе ва гьенир ругел банказда гъозул активал ругони – гьел цIорозаризе руго.