Украиналъул ТIадегIанаб Радаялъ тасдикъ гьабуна рагъулал блоказда гIахьаллъунгутIиялъул статусалдаса инкар гьабулеб къануналъул проект. Парламенталъухъе гьеб кьун букIана улкаялъул президент Петр Порошенкоца 18 декабралда.
ОБСЕялда Россиялъул даимав вакил Андрей Келиница лъазабуна, Москваялъ гьеб гали къабул гьабулеб бугин гьалмагълъиялъул гуреб гали хIисабалдайин.
Россиялъул премьер-министр Дмитрий Медведевас Facebook-алда хъвана блоказда гIахьаллъунгутIиялъул статусалдаса Украиналъ инкар гьаби кколин хIакъикъаталдаги НАТОялде гъорлъе лъугьиналъе гIарза кьураб гIадаб жойин.
Гьелъ гьеб улка ккезабулеб бугин Россиялде данде чIарал улкабазул сияхIалде гъорлъейин.