Косовоялъул парламенталъ талат къоялъ къабул гьабуна цIияб хIукуматалъул сияхI. Гьелъул бетIерлъун вихьизавун вуго Приштинаялъул вукIарав мэр ГIиса МустIапа.
8 декабрялда МустIапал «Демократикияб лигаялъ» коалиционияб къотIи-къай гьабун буго гьанжесев премьер-министр Хашим Тачил «Косовоялъул Демократикияб партиялъулгун».
Хашим Тачи 2008 соналда Косовоялъул эркенлъиялъе гIоло Сербиялде данде бачунеб рагъда албаназул аскариязул цевехъанлъун вукIана.
Жибго жидедаго чIараб пачалихълъун Косово къабул гьабуна нусгоялдаса цIикIкIараб улкаялъ, Цолъарал Миллатазул ГIуцIиялда ветоялъул ихтияр бугеб Россиялъ гьелде данде чIолеб буго.
Талат къоялъ Косово къабул гьабун буго Халкъаздагьоркьосеб Олимпиялъул комитеталъги. Гьелдалъун гьеб республикаялъе рес щвана 2016 соналда Рио-де-Жанейроялда рукIине ругел Олимпиял хIаязда гIахьаллъизе.