Цолъарал Штатазул Конгрессалъул церехъабаз арбагI къоялъ Капитолиялъул минаялда гIахьаллъи гьабуна гьениб Чехиялъул ва Чехословакиялъул экс-президент Вацлав Гьавелил бюст рагьиялъул тадбиралда.
Гьелда гIахьаллъана Гьавелил йикIарай чIужу Дагмар Гьавелова ва Чехиялъул премьер-министр Богуслав Соботка.
Гьеб тадбиралда кIалъазе вахъарав вакилзабазул Палатаялъул спикер Джон Бейнерица абуна Вацлав Гьавелица коммунистазде данде цохIого цо ярагъ хIалтIизабун букIана – хIакъаб рагIи, гьединаб ярагъ коммунистазул букIинчIин ва гьеб сабаблъун гьел къунги рукIанин.
Демократазул вакил Ненси Пелосица жиндир каламалда абуна, Гьавелица тIолго дунялалъе бихьизабунин демократия ва инсанасул ихтиярал цIуниялъул мисал.