Тегераналда туснахъулъ цо сон кьун буго Гончех Гавами абулей ясалъе. Гьелда гIунтIизабулеб буго «нухмалъиялда бугеб системаялде данде пропаганда гьаби» абураб гIайиб. Полициялъ гьей ккун йикIана 20 июналда Ираналъул ва Италиялъул бихьиназул командабазда гьоркьоб унеб букIараб волейболалъул къец бихьизе рачIарал цоги руччабазда цадахъ.
25 сон барай Гавамил буго Ираналъулги Британиялъулги ватIанлъи. Гьей жаний ккун ругел шартIазда ва гьелда тIад процесс гьабизе чIезабураб гIиллаялда кIудияб гIагали бугин жидерин лъазабулеб буго Британиялъул къватIисел ишазул идараялъ.
«Би-би-сиялъул» баяназда рекъон, Гавамида цадахъ ккурал цоги руччаби къватIире риччалалде цере рухун рукIун руго. Гьелгун йиччан йикIарай Гавами цIидасан жаний тIамунги йиго. Гьей эркен гьаейин гъулбас бакIарун буго 700 азарго чияс.
Ираналда руччабазе гьукъараб буго волейбол, футбол гIадинал спорталъул къецазухъ балагьизе. ТIалъиялъ гьеб бичIчIизабулеб буго матчазухъ балагьарал бихьиназул квешаб хьвадиялдаса руччаби цIунизе бахъулеб хIаракатлъун.