ХIалтIи тун как баялъухъ хIалтIудаса махIрум гьавурав Дагъистаналъул ОМОНалъул хIалтIухъан Мавлидин Алхасовас Россиялъул тIадегIанаб диваналде битIун буго гIарза жив нахъ вуссун хIалтIуде воси тIалаб гьабун. Гьедин лъазабулеб буго Алхасовасул адвокат АхIмад Утбатовас.
Мавлидин Алхасов хIалтIудаса нахъе рехун вукIана гьаб соналъул анварь моцIалъ. Гьев нахъе витIиялъе гIиллаги ккун буго гьев жинцаго цIунулеб букIараб МахIачхъалаялда бугеб ОМОНалъул базаялда хIалтIи тун как базе лъугьин.
Живго Мавлидинил рагIабазда рекъон гьев как балев вихьун вуго гьеб параялъ гьенив векерулев вукIарав командир хисулесда. Гьев Аллагьасда божи гьечIев, кидагоги дин инжит гьабулев чи вугилан бицана гьес.
Жив хIалтIи тун гьеб как балев вукIин бихьидал гьес инжит гьарулел рагIаби абун руго, Мавлидиница гьесие жаваб кьун буго. Гьелдаса хадуб жив хIалтIудаса нахъе реханила.
Алхасовасул адвокатасул рагIабазда рекъон гьез гIарза кьун буго къанунал хвезарун нахъе рехун вугин гьев хIалтIудаса абун. Киров мухъалъул МахIачхъалаялъул диваналда гьев витIаравлъун рикIкIун вуго ва хIалтIуде тIад вуссун вуго, амма заманго иналде Дагъистаналъул тIадегIанаб диваналъ, жанисел ишизул идараялъул вакил Селимханов ГIумарил гIарзаялда рекъон, гьев нахъе рехун вуго.
КIигьумераб политика тIобитIулеб бугин жанисел ишизул идараялъилан рикIкIунеб буго жамгIияталъ. Адвокат Расул Къадиевасул пикруялда кидаго цоялдаса цоял бакIал такъсирал гьарурал чагIи жалго толел руго гьезие данде кколел ругони.
Дагьабниги мухъдаса хIурчч тарараб жо кканани гьезие берзуе гIечIев пакъир нахъе витIулев вугила.
ЖамгIияв хIаракатчи Шамилов МухIамадица «Эркенлъи» радиоялъе бицана, Алхасов нахъе рехиялъе гIилла батIияб букIанин , как баялъухъ абураб жо гьадингояб жо бугилан. Гьесул рагIабазда рекъон гьеб буго гьесие Къадиев Юсупица гьабураб рецIел.
МухIамад Шамилов: «Как бан буго посталдаго. КъватIивехун инчIого. Гьеб базе уна 3 минут. Гьеб как бай буго чIобогояб гIилла. Полициялъул полковник Юсуп Къадиев сабаблъун рехана гьев нахъе. Жиндир заманаялъ гьев Къадиев Юсупица ОМОНалъул окопал рухъаралъул гIарац бикъун букIун буго.
Гьеб бикъи лъайдал ОМОНалъул командир Загьидов Загьидица буюрухъ кьун буго гьев ОМОНалъул базаялде жаниве виччагеян. Алхасовас гьев виччан гьечIо. Заманалдаса гьев Къадиев нахъ вуссана хIалтIуде. Дагъистаналда билълъун араб гьечIищха квералъ квер чури. Гьев нахъ вуссун вачIараб заманаялъ Россиялъул бахIарчи Загьидов вукIинчIо хIалтIуда.
Цинги гьев Къадиевас Алхасовасе бецIана гьес жив нахъе вачахъи. Цинги диваналъги Къадиевасул рахъ кколеб буго. Гьел цуцаца рахчулеллъидал рукIунел. Гьанже цоги суал буго гьев тIад вуссине рес бугебдай абун, щайгурелъул Россиялда къуваталъул идараялдаса нахъе витIарав чи кинаб гIилла батаниги тIад вуссун восуларевлъул».
Гьединго Шамиловас бицана гьесде гIайиб гIунтIизабулеб бугила ярагъ цIунараб бакI тIалаб гьечIого танин гьес абун, амма гьеб битIарраб гьечIила. Яргъил нахърател бугеб бакIалда хасал цIунелел чагIи ругила.
Экспертазул пикруялда Дагъистналалда гражданияб рагъ унеб буго. Гьеб полициялъулалазда гъорлъ Аллагьасда данде рагъ балеб бугила. Гьевго Къадиев рикIкIунев вуго гьединав чилъун.
Цо заманаялъ как балеб рукъа рукIана кирго полициялъул бутIабазда. Гьанже гьеб лъугIизабулеб буго. Полициялъул хIалтIухъаби хIежалдецин риччаларин абулеб буго экспертаз.
ЖамгIияталъул пикруялда, чIужугIадан инжит гьаюрай полициялъуласе щибго тамихI гьабичIого толев вугила. Как хIалтIуда банилан нахъе рехулев вугила цогдав. Гьелдаса бихьулила къуваталъул идараялда бугеб ахIвал-хIал.