Россиялъул къватIисел ишазул министр Сергей Лавровас талат къоялъ Москваялда тIобитIараб пресс-конференциялда лъазабуна жинца хьул лъолеб бугин жалго жидедаго Донецкалъул ва Луганскалъул абулеб республикабазул статусалъул суалгун гьоркьоб кIалъа-басаял кватIичIого байбихьизе букIиналда.
Гьес гьединго официалияб Киевалде гIунтIизабуна заманалъулаб маслигьаталъул къотIи-къай хвезабиялъул гIайиб.