ГIиракъалъулги Сириялъулги кIудиял территорияби ккун бугеб «Исламияб пачалихъ» абураб радикалиял исламистазул гIуцIиялъ тIибитIизабуна Цолъарал Штатаздаса жив киве ккаравали лъачIого тIагун вукIарав журналист Джеймс Фоули чIвай бихьизабураб видеохъвай-хъвагIай. «Америкаялъухъе кагъат» абураб видео интернеталда бахъун буго талат къоялда.
Фоули киве ккаравали лъачIого тIагIун вукIана Сириялда 2012 соналъул ноябралда. Гьес гьениб тIабазабулеб букIун буго Global Post абураб Бостоналъул онлайн-газетаялъул тIадкъай. Видеоялда вуго гьединго Америкаялъул Time журналалъул мухбир Стивен Сотлоффги. Гьев тIагIун вукIана 2013 соналда Ливиялда.
Видеохъвай-хъвагIаялда терроористас лъазабулеб буго, Сотлоффил къисмат хурхараб букIине бугин Цолъарал Штатазул президент Барак Обамал «хадусеб хIукмуялдайин».
Youtube-алда лъураб тIоцебесеб видеоялда бихьизабун букIун буго Фоулил бетIер къотIулеб куц. Хадуб гьеб хисун буго гьеб фрагмент гьечIеб варианталде.