Шималияб Кавказалъул министр - Дагъистаналда

Дагъистан Шималияб Кавказалда бищун кIудияб республика букIинги, гьениб ахIвал-хIал кинаб батаниги, гьелда релълъун мадугьалихъги букIунеблъиги хIисабалде босун вачIарав чи вугин Лев Кузнецов Дагъистаналдеян абураб пикру буго политолог ва журналист Руслан Гереевасул.

Руслан Гереев: «Министрас хIисабалде босизе буго Дагъистаналда инвестициязул проектал кин рилълъанхъизарулел ругелали, спорталъулъ бергьенлъаби кинал ругелали, мадугьалзабигун Дагъистан кинаб гьоркьоблъиялда бугебали. Хасго Гуржиягун ва Азербайжангун. Гьел кIиязулго гIадин гьоркьорлъаби Дагъистаналъ Казахстаналъулгунги Туркмениялъулгунги гьабизе бегьула. Гьедин министрасда ракIалда батула гьеле гьел рахъазде кIвар кьезе».

Мадугьалзабазулгун гьудуллъи, хасго культураялъулгун экономикаялъул бухьенал щулалъизаризе ккеялъул Дагъистаналъул бетIер Рамазан ГIабдулатIиповасги бицана Россиялъул министрасе. Амма гьел мадугьалзаби кколел руго Гуржиягун Азербайжанги, Чачангун Ставрополь мухъги. Министр Лев Кузнецовасги абуна Шималияб Кавказалъул рахъалъ цIигIуцIараб министерлъиялъул бергьенлъаби рарал ругин Шималияб Кавказалъул регионазул бергьенлъиялда. Амма гьел регионал цоцадаса ратIа тIун чIун ругин абураб пикру рагIизе бегьула Дагъистаналда. Масала, исана маялда МахIачхъалаялъул экономикияб форум тIобитIун букIана Шималияб Кавказалдасаги, Россиялдасаги, гьединго къватIиса пачалихъаздасаги вакилзабиги ахIун.

Гьедин Дагъистаналъул нухмалъиялда данделъиги гьабун, Лев Кузнецовги цадахъ рукIаралги киналго Новолак мухъалдаса гочинарулел тумазулгун дандчIваялде ана. Чачаназ дагIба балеб Новолакалдаса гочинарун МахIачхъалаялде аскIоре, Новостроялде, рахъинарулел руго гьел. Амма гьеб суал хадуб бехъерхъулеб буго къогоялдаса цIикIкIун саназ. Жидее минаби разе кьураб гIарац кваналеб бугин хIакимзабазин абула бакIалъул гIадамаз. Гьединаб магIнаялъул гIарз бахъулеб букIун буго цо гIолохъанав тумас 13 августалда Новостроялде щварав Лев Кузнецовасде. Гьедин бицана ЭР-ялъе Новостроялда минаби ралеб хасаб идараялъул пресс-секретарь ХIуризада Камаловалъ.

ХIуризада Камалова: «Байсултанов абун вуго министр Кузнецов хисулев чи. Гьес дов аскIове вачIарав гIолохъанчиясда абуна жал хас гьабун гьеб нужер суалалъе гIоло цIидасан рачIинин Дагъистаналде. Гьеб мехалда ракIарилин нуж киналго, рази гьечIелщинал чагIи данде. Гьедин Москваялдаса вакилзабаз хал гьабун тана Новолакалдаса Новостроялде гочинарурал чагIазе минаби кинан ран ругелали, исана лъимал цIализе риччазехъин бугеб лъабабго школа кин барабалиги. Министр Кузнецов разилъун вукIин бихьулеб букIана. Цинги минабазухъги балагьун нахъруссун рачIунаго нухда данде векерун вачIана дов гIолохъанчи. Жидее ракьалги кьолел гьечIин, гьел кьезе къваригIани, ришваталъе гIарацги тIалаб гьабулеб бугилан бицине».

Шималияб Кавказалъул рахъалъ Россиялъул министр Лев Кузнецов Дагъистаналда вукIине вуго жеги 14 августалдаги. Гьев щвезе вуго Дербенталдеги цIи гьабулеб МахIачхъалаялъул аэропорталдеги.

Кузнецовас нухмалъи гьабулеб министерлъи Россиялда исана июнь моцIалда гIуцIана. Гьелдалъун Россиялъул хIукуматалъе къваригIун бугин рагъулаб къагIидаялдаса инкарги гьабун, экономика цебетIолел къагIидаби хIалтIизаризеян абула экспертаз.