Китаялъул Синьцзя́н-Уйгу́р абулеб автономияб вилаяталда бугеб Карамай шагьаралда тIадтараз бусурбабазул бихьиназе халатаб мегеж, ва руччабазе хIижаб ретIизе гьукъана автобусалде рекIулаго.
Рехсараб вилаяталда аслияб къагIидаялда уйгур миллаталъул бусурбабаз яшав гьабулеб буго.
Ахирисеб чанго соналда жаниб гьениб бижулеб буго сепаратизм. Яргъид гIуцIарал бусурбабаз чанго нухалъ тIаде кIанцIана гьениб гIумру гьабулеб хань миллаталъул вакилзабазде. Араб анкьида яргъид гIуцIараз цо административияб минаялдеги полициялъул бутIаялдеги гьабураб гьужумалъул хIасилалда нусгогIан чи чIван вуго.