Нидерландазулги Австралиялъулги 70 гIанав экспертазул къокъа щун буго рузман къоялда Украиналъулъ машрикъалъул рахъалда Малайзиялъул авиалайнер бортараб бакIалде. Гьез байбихьун буго гьенир хутIарал хваразул жаназаби ралагьизе. Нидерландазул Юстициялъул министерлъиялъул лъазабиялда абулеб буго, хIалтIи унеб бугин чанго бакIалдайин.
Рузман къоялда Украиналъул вице-премьер Владимир Гройсманица лъазабун букIана, аэроплан бортараб бакIалда гьанжеги жаназаби ругин. Австралиялъул къватIисел ишазул министр Джулия Бишопил рагIабазда, гьениб букIине бегьула гьанжеги 80 гIанаб жаназа. 200 гIанаб жаназа битIун букIана цебе Нидерландазде. Ахирисел баяназда рекъон, «Боингалъул» катастрофаялъул къурбанлъун рахъаразда гъорлъан I96 вукIун вуго Нидерландазул гражданав.
Хамиз къоялда сепаратистаз Голландиялъул экспертазухъе кьун буго гьединго 25 генетикияб материал ва 27 чиясул хасал алатал. Донецкалда аскIобехун Малайзиялъул «Боинг» бортизабуна 17 июлалда.