Афгъанистаналъул президентлъиялде кандидат, къватIисел ишазул министрлъун вукIарав доктор ГIабдулло чIвазе хIалбихьи гьабун буго Кабулалда. Хун вуго ункъго чи, живго политикасе зарал ккун гьечIо. Гьелъул хIакъалъулъ нижер радиоялъе лъазабуна, Афгъанистаналъул жанисел ишазул министерлъиялъул вакилас. Живго ГIабдуллол рагIабазда, зарал ккун буго автомобилалъе. КIиго бомба кьвагьун буго Кабулалъул магърибалъул рахъалда бугеб петералда аскIоб. Гьениб тIобитIулеб букIун буго кандидатасул рищияздацебесеб митинг. Гьеб акталъул жавабчилъи гьанжеги лъицаниги тIаде босун гьечIо. Доктор ГIабдуллол бищунго кIудиял шансал руго I4 июналда тIоритIизесел президентасул рищиязул кIиабилеб туралда. Гьесул конкурент ккола финансазул министр Ашраф Гьани.
