Копейскалъул номер анлъабилеб туснахъалда тIатун руго къанун хвезабиялъул хIужаби. Гьедин лъазабуна Москваялда тIобитIараб пресс-конференциялда инсанасул ихтиярал цIунулез. Гьел унел рукIун руго президентасда цебе гIуцIараб инсанасул ихтиярал цIуниялда сверун Шураялде гъорлъе. ЦIех-рех гьабулеб букIараб къукъаялъ лъазабулеб буго гьеб туснахъалда тIамурал рухулелги, хIакъир гьарулелги, рукIун ругин, гьезие жинсияб зулмуги гьабулеб букIун бугин, лагъзалгIадин хIалтIизеги гьарулел рукIун ругин, гьелде тIадеги-гьеб кинабго туснахъалда гIадатияб ишлъунги лъугьун бугин.
