Временный росулъ, 18 сентябрлъ терроризмалда данде къеркьолеб режим лъазабуралдаса нахъе араб лъачIого тIагIун ругел гIадамазул гIага-божараз жакъа къоялъги гьезул хIакъалъулъ щибго лъалеб жо гьечIилан абулеб буго.
19 сентябрялъ, хасал тадбирал тIоритIулаго Временный росулъа ХIапизов Султанбег, Камилов МухIамадзагьид, Шамилов МуртазгIали рагъулаз ккун руго, амма кир гьел ругел ва кире гьел аралали лъалев чи гьечIо.
ГIицIго Камилов МухIамадзагьид тIагIун кIиго къоялдаса Лаваша росдада аскIов нухда ватIун вуго. Гьес эбелалъухъе ахIун лъазабун буго жив вугеб бакI.
ХIапизов Султанбег ва Шамилов МуртазгIали кив кир ругелали жакъа къоялъги ратун гьечIо.
Шамилов МуртазгIали ккун вачун иналъул гьесул яс Шамайица баян гьабуна, I9 къоялъ гьесул рокъоре 10-ялдаса цIикIкIун чагIи рачIун чIухь базе лъугьанин. Гьеб параялъ живго МуртазгIали рокъов вукIун гьечIо. ГIицIго гьезул нус гурей чи вукIун гьечIо. Рагъулаз гьев рокъове ахIейилан абун буго.
Гьев чIухь базе чагIи рачIун рукIин лъараго рокъове вачIун вуго. Рагъулаз МуртазгIали батIияв рокъовехун вачун ун вуго. Заманаялдаса , рокъоса чагIи ун рукIин бичIчIидал , гьесул нус къватIие яхъун йиго. Мадугьалалъ бицун буго МуртазгIали вачун анин гьез цадахъилан.
Заманаялдасан, жийго Шамайида хъвай-хъвагIай гьабулеб бакIалда вихьун вуго эмен. Гьес абун буго рагъулаз гъоркьарухъ бункер бугин абулеб бугин, амма гьеб щиб кинали бичIчIидал жив виччазе вугилан.
ХIапизов Султанбег, бакIалъул гIадамазул рагIабазда рекъон, Камилов МухIамадзагьидида цадахъ Урал машинаялда вачун унев вихьун вуго, тIокIаб гьесул лъалеб жо гьечIо.
«Эркенлъи» радиоялъ бухьен гьабуна Унсоколо мухъалъул Жанисел ишазул идарагун, амма гьезул рагIабазда рекъон, щивгIаги ккуразул гьенире рачIун гьечIо, гIиллаги гьелъие бугила, терроризмалда данде къеркьолеб режим лъазабуралдаса нахъе гьезул жаваблъи букIунгутIи гьеб лъазабураб бакIалда, гьелъ киналгIаги тIагIарал ва ккурал чагIазул цIех-рех терроралда данде чIараб миллияб комитеталда гьабизе кколила.
Шамилов МуртазгIалил яс Шамайица гьединго баян гьабуна , жидеца эмен валагьизе адвокат ккун вугилан ва гьединго интернет-сурсатазда тIиритIизхарун ругин гьесул суратал. Гьелъул рагIабазда рекъон, гьезухъе мухIканаб гуреб бакIалдаса хабар щун буго эмен чIаго вугилан. Гьадин бицана гьелъ «Эркенлъи» радиоялъе.
Шамилова Шамай: «Сон вугеб бакI лъана нижеда. МухIканаб жо гьечIо. Балъгояб бакIалдаса бачIана хабар, жив лъикI вугилан, ургъел гьабугейилан. Нижеца адвокат ккун гьесги валагьулев вуго гьев. МуIканаб жо гьечIо, амма нижерго гIадамазда вихьун вугиланги абулеб буго. Балагьараб мехалъ гIурусазухъ вугоха гьев»
Шамиловалъул баяназда рекъон , МуртазгIалида цадахъ тIагIарав ХIамизовасул щибго лъалеб ва рагIараб жо гьечIо. Гьелъ баян гьабуна, гIайиб чIезабунани жанир тIамун, яги, туснахъ гьари цо жо бугин, амма кире аралали лъачIого чи тIагIин гьеб кинаб къануналда бугебали лъаларого бугин.
Унсоколо мухъалда лъазабун бугеб хасаб низамалда сверухъ официалиял баянал цIакъ мукъсан ругин, жанисел ишазул идараялъ кинабгIаги информация мухIкан гьабунгутIиялъ мухIканго абизе рес гьечIин, амма Временный росулъ бункерал ва кьвагьизе къачIарал хасал алатал ратиялъ халатбахъунеб бугин гьениб хасаб операцияйилан рикIкIунеб буго экспертаз.
Гьединго 10 октябрялъ рагьизе букIараб гендерил тоннель 15 октябрялъ рагьизе бугилан лъазабулеб буго терроралда данде къеркьолеб комитеталъ.
