Ахирисеб Россиялъул чемпионаталда рихьизарурал хIасилазда рекъон МахIачхъалаялъул командаялъе рес щвана Лига Европы абураб турниралда гIахьаллъи гьабизе. УЕФА-ялъ гьединаб хIукму гьабиялъе гIиллалъун рехсолеб буго республикаялда хIалуцараб ахIвал -хIал букIин. БатIайиса абуни гьел хIинкъун руго Дагъистаналде рачIине.
ТIадехун рехсараб гIуцIиялъ гьабураб хIукмуялда разилъичIого гIемераб хъуй бахъинабуна Анжиялъул фанатаз гьал къоязда. Интернеталда хитIабгун цеве вахъана «Дикая дивизия» къукъаялъул цевехъан Гъазиев Рамазан. Жиндирго кIалъаялда гьес абулеб букIана нилъ, футбол бокьулел Дагъистаниял разилъизе бегьуларин гьеб хIукмуялдаян. Гьес рикIкIунеб буго УЕФА-ялъ гьеб хIукму ургъичIого гьабун бугин ва Дагъистаниязедхун хитIаб гьабун, гьес киналго ахIулел руго шамат къоялъ тIобитIулеб митингалде.
Футбол бокьулезул рахъ ккун УЕФА-ялъул президент Мишель Платиниде хитIаб гьабун буго гьединго Дагъистаналъул нухмалъулев МуIхамад-Салам МухIамадовасги. Амма гьесул хитIаб дозухъе жеги щун батиларилан кколин жиндаян бицана ЭР-ялъе «Дикая Дивизиялъул» пресс хъулухъулъул нухмалъулей ХIайбат Муслимовалъ.
УЕФА-ялъул нухмалъияб гьабураб хIукмуялдаги разилъичIого анжиялъулаз битIараб хитIабалъе жаваб кьолаго кIиабизеги инкар гьабун буго гьез, ва жидерго хIукму хисизабизе ракIалда гьечIеблъи бичIчIизабун буго.
ХIайбат Муслимова: «Митингалда нижер мурад буго Дагъистаналда кинабниги рагъулаб ахIвал хIал гьечIеблъи ва УЕФА-ялъ гьедин абизе гьезул изну букIинчIеблъи бичIчIизабизе. Гьалдаса цебе эркенаб гугариялъул рахъалъ халкъаздагьоркьосеб къецги тIобитIун букIана гьаниб, гьединго Россиялъул чIахIи-чIахIиял клубалъул командабиги.
Нилъер гьаниб футбол хIалеб заманлда жаниб щибниги ккарб жоги букIинчIо жеги. Гьеб гуребги республикаялъул хIукуматалъги рагIи кьун буго гьанире рачIарал къватIиса командабазе хIинкъи гьечIолъиялъул шартIал гIуцIизе».
Митинг тIобитIизе республикаялъул нухмалъиялъ официалияб къагIидаялъ изнуги кьунин жидееян абуна ХIайбат Муслимовалъ хадубги. «РИА –Дагестан» информациялъул агентлъиялъ жидерго баяналда абулеб бугоан шамат къоялъ тIобитIулеб митингалда чанго азарго чи гIахьаллъизе вугилан, амма ХIайбат Муслимовалъ бицаралда рекъон ракI чIун лъалеб буго гIицIго «Дикия дивизиялъул» 500 гIанасев чи гьенив гIахьаллъизе вукIин, гIаммаб къагIидаялъ гьенив чан чи вукIиневали жеги лъаларилан абуна гьелъ.
МахIачхъалаялдаса Сиражудин МухIамадовас рикIкIунеб буго гьеб митинг тIобитIунилан УЕФА-ялъул нухмалъиялъ жидерго хIукму хисизе гьечIилан. Росиялда жанибго хурхараб суал гьеб букIарабани хьул гьабизе бегьилаанин митингалъ хIасил кьелилан. Амма Европаялда ругел футболалъул хIакимзабаз Дгъистаналда тIоритIарал дандечIеязул миллат гьабизе гечIилан.
Сиражудин МухIамадов: «Россиялда жанисеб суал букIарабани тIадецуй гьабизе бегьилаан лъидениги митингазул кумекалдалъун. Амма Европаялъулаз абизе буго тIоритIейин нужерго митингалги, кинангоги рагъ-кьалалъул сас къотIулареб республикаялде ниж рачIунарин абун. ГIицIго хьул гьабизе рес букIана гьениб гьаниб аскIоса гIебеде гьел хIаял тIоритIизе изну гьез кьурабани. Мисалалъе Азерабайджан республикалда, гьенире ине нилъееги бигьаго бакIинаан. Гурони Европаялде щвезегIанишха инел футболалъухъ балагьизе гIоло».
Амма гьанибго абизе ккола Дагъистаналул боксалъул рахъалъ дунялалъул чемпион ХIабиб Аллахвердиевасул промоутер Владимир Хрюновас лъазабуна гьал къоязда жив хIадур вугин ХIабибил иргадулаб дандчIвай МахIачхъалялда тIобитIиялъе квербакъи гьабизеян.
Гьединаб лъазаби гьес къватIибе кьуна УЕФА-ялъ Анжиялда хурхун гьабураб хIукуму рагIун хадуб. Гьелдалъун гьесие бокьун рагула УЕФА-ялъул нухмалъиялда бичIчIизабизе спортивиял дандчIваял Дагъистналда тIориIтIиялдалъун щибниги хIинкъи гьечIеблъи.
