ЦIорол дада сабаблъун гьабулеб дагIват

ЦIияб соналъул къо кIодо гьабугеян халкъалдехун хитIаб гьабурал тIамчал гIадамазухъе рикьаралъухъилан декабаралъул 28-б къоялъ ккун рукIана гьел гIолохъаби Хасавюрталъул полициялъул хIалтIухъабаз.

Жанир тIамун рукIаразул цояв Гъизилюрт мухъалъул Чонтаул росулъа Хучбаров МухIамадица информациялъул алатазе бицухъе гьевги гьесул вацгIал ГIабдулкаримов МухIамадги риччан руго гьениса бищун ахиралде.

Гьединал тIамчал республикаялъул шагьаразда гурелги гьединго магIарул росабалъа гIебедеги рикьулел рукIана декабралъул ахиралда. Гьелъул хIакъалъулъ дагьаб гIатIидго нижее бицине разилъана Шамил мухъалъул ГIурада росулъа ГIабдлулхаликъов МухIамад-хIажияв. ЦIияб сон тIаде щвезе чанго къо щвелалде ахирисеб рузманкъоялъул вагIзаялда дибирас гьеб байрамалда хурхун вагIза гьабун хадуб жиндирги гьесулги хIукму кканин гьеб байрам кIодо гьабугеян абураб хитIаб гьабурал тIамчал росдада гьоркьор рикьизе. Росулъ санаде рахинчIел лъималазул кумекаладлъун рикьанин жидеца 200 гьединаб тIамач, гьеб щиб гьабизе кьолел жалилан абулел чагIиги рукIанин, ругониги гIемерисел чагIаз тIадкIалъай гьабичIого къабул гьарунин гьел тIамчал. Гьебго къоялъ къаси гьезул школалде жаниреги кIанцIун цIияб соналъул байрамалда хурхун тIобитIулеб тадбиралде лъималазе къачIараб накIкIигъветI бекун батун буго. Гьеб гьабурал чагIи лъазе кIвечIеб мехалъ школалъул нухмалъулес гьеб мухъалъул жанисел ишазул идараялде ахIун буго гьелъул хIакъалъулъ.

Нахъисеб къоялъ бакъаникакдаса хадув мажгиталъул кIалтIа жив вукIаго бачIанин полициялъул хIалтIухъаби тIад рекIараб аватомобиль ва мун нижер идараялъул нухмалъулес ахIулев вугин жидеда цадахъ вилълъине кколилан лъазабун буго гьез МухIамад-хIажида, гьединго гьесда цадахъ школалда байрамалъе къачIараб накIкIигъвет хвезабиялде щаклъи бугел чагIи хIисабалда гьезулго росулъа жеги кIиго чиги вачун вуго низам цIунулез.

ГIабудулхаликъов МухIамадхIажияв: «Полициялъул нухмалъулес тIоцеве дун ахIана жаниве. ТIамачги цебе лъун бйбихьана гьикъизе щиб гIиллаялдалъун лъицаги малъун нужеца гьаб гьабулеб бугеб, экстремизмалде халкъ ахIулеб нух бугин нужеца малъулеб, росдал имам вагьабистищила нужер кколев аб добилан хабар бицана гьес. Дуца рикьарал тIамчазда хадуб бекун рагIулин щоколалда накIкIигъветI, дуда лъалел ратулин гьел чагIийилан абулеб букIана гьес. Валлагь лъалеб букIинчIо дида гьеб гьанжеги лъаларо лъица гьеб пиша гьабурабали. Къуръаналда кверги лъун гьедилин дун гьелъиеян абуна дица досдаги. Гьединаб хабаргун ратIалъанаха ниж.

Хадув цIех-рехалъул хIалтIухъанас ахIана дун, гьесги добго хабар бицине тIамуна доб къоялъ радал вахъаралдаса вегизегIан дун кив вукIарав, щиб гьабулев вукIаравали цебесан бицине тIамуна цо бакIалда гъулбасизеги тIамун гьанже ине бегьулилан абуна. Цадахъ рукIарал кIиялго рачIинегIан чIана дун кIиго сагIаталъниги. Гьелдаса хадур цIех-рехалъул хIалтIухъанас жиндирго рокъореги рачана квана -гъанан гьесул гьениб сордоги бан нахъисеб къоялъ росулъе тIадруссана».

ЦIияб соналъул байрам кIодо гьабизе гьукъизе я шаргIалъул, я цогидал гIадамазул лъилниги гьечIин ихтиярилан абуна «Эркенлъи» радиоялъе МахIачхъалаялдаса юрист ГIамирханов ШапигIица. Жибго гьеб байрам кIодо гьабиги батIи-батIияб букIунин кинаб къагIидаялъ дуца гьеб кIодо гьабуниги гьелда бараб бугин. Гьеб кIодо гьабугеян абурал тIамчал халкъалъухъе рикьунилан абун полициялде гьел рачинеги низам цIунулезул ихтияр гьечIилан рикIкIунеб буго ШапигIица:

ГIамирханов ШапигI: « Гьел гьенире рачине ккани гьел тIамчазда букIине ккола лъие букIаниги кьолеб хIинкъи ялъуни экстремизмалде гIадамал ахIулеб цониги мисал, гьезда релълъараб пикру гьениб бугони гьукъизе ккола гьеб, гьечIонани гьеб гьукъизе ихтияр гьечIо лъилниги. Къануналда кибниги хъван гьечIо гьеб байрам гьукъизе бегьуларилан абуралъухъ тамихI гьабизе кколилан. Полициялде рачине ихтияр гьечIо гьезул, гьезул гьелъие изну кьолеб санкция гьечIо».

ЦIияб соналъул байрам кIодо гьабиялда тIасан Дагъистаналда бахIсал цIикIкIунел ругелдаса чанго сон буго. Амма абизе ккола цебе гIадин кIудияб ахIи-хIуралда кIодо гьабулеб гьечIо гIадамаз гьеб. Байрамалда хадур кьолел гIодоркъоязул 10 къоцин цIакъго гIемераб бугилан абулелги руго гьезда гьоркьор.