Рищиязе байкот лъазабуниги ГIабдулатIиповасул рахъ кквезе буго коммунистаз

Дагъистаналдаги Гъалгъаязул республикаялдаги президентал рищизе руго парламенталъ. Гьелда цебе парламенталда гъорлъ ругел партияз жидерго кандидатазул цIарал лъазаризе ккола ва гьезул сияхIалъул халгьабизе буго Россиялъул президент Владимир Путиница. Гьеб сияхIалдаса гьес рищизе бегьула президентлъун рукIине бегьулел кандидатал ва гьезда гьоркьоса парламенталъ вищизе вуго республикаялъе президент. Гьединал рищиязул система ритIукълъи гьечIеблъун бугилан рикIунеб буго коммунистазул партиялъ.

«Единая Россия» ва «Справедливая Россия» партияз жеги лъазабичIо кандидатазул цIарал кида тIатинаризе ругелали. Амма партияз кандидатал рихьизаризе ккола гьал къоязда. «Единая Россия» партиялъул лъазабиязда рекъон, 20 июль щвезегIан цIарал тIатинаризе ккола Дагъистаналда, 23 июль щвезегIан – Гъалгъаязул республикаялда. Кандидатазул сияхIни моцIалъул ахиралда щвезабизе буго Путинихъе, гьениса гьес лъабго чи вищила ва гьезда гьоркьосан, цебе абухъе, парламенталъ вищила президент.

«Коммерсант» газеталъ хъвалеб буго «Единая Россия» партиялъ кандидаталлъун рихьизаризе ругин лъабгояв: Халкъияб мажлисалъул нухмалъулев Хизри ШихсагIидов, дагъистаналъул хIукуматалъул нухмалъулев Мухтар Межидов ва Федерациялъул Шураялъул вице-спикер Ильяс ГIумаханов. Газеталъе гьел цIарал тIатинарун руго Дагъистаналъул хIукуматалда хIалтIулев вукIарав цо чияс, щив гьев чи вугевали «Коммерсанталъ» мухIканлъи кьолеб гьечIо. Гьесул рагIабазда рекъон, Кремлалда батIаго божи гьечIо Рамазан ГIабдулатIиповасда.

Амма ГIабдулатIипов кандидатлъун вихьизавуна «Патриоты России» партиялъ. Гьесул гуребги жеги кIиго чиясул цIар абуна «патриотаз»: партиялъул Дагъистаналда бугеб бутIаялъул цевехъан Эдуард Хидиров ва Дагъистаналъул ХIисабалъул палатаялъул нухмалъулев Малик БагIлиев.

Коммунистазул партиязул Централияб комитеталъул секретарь Сергей Обуховас гьал къоязда лъазабуна жал гIахьаллъизе гьечIин рищиязда. 18 июлалда ЛДПР партиялъги кьезе ккола жаваб – рихьизаризе ругищ яги гьечIищ кандидатал.

КПРФалъул Дагъистаналъул рескомалъул секретарь Сапиюлла Бамматовас абуна «Эркенлъи» радиоялъе рищиязда жидеца вакилал рихьизаричIониги жидеца рахъ ГIабдулатIиповасул кквезе бугин.

Сапиюлла Бамматов: «МагIна кинаб бугеб? Вихьизавуниги вихьихьизавичIониги кандидат, магIна кинаб бугеб? Халкъиял рищиял рукIаралани цоги хабар буго. Халкъияб мажлисалда коммунистазул анлъго гурони депутат гьечIо. Единорасазул цIун буго мажлис, ритIухъал рищиязул бицуне нечезе ккола гьединаб ахIвал-хIалги букIун. Гьединлъидал нижеца данделъиялда хIукму къотIана рищиязда кандидатал рихьизаричIого чIезе. Амма цогидал партияз рихьизарурал кандидатазда гъорлъ Рамазан ГIабдулатIипов вугони, гьесул рахъ кквезе буго мажлисалда ругел коммунистазул депутатаз».

«ТIолгороссиялъул халкъияб фронталъул» вакил ва Пачалихъияб думаялъул депутат Михаил Старшиновас рикIунеб буго Гъалгъаязул республикаялъул ва Дагъистаналъул президенталлъун рукIине мустахIикъаллъун кколин гьел регионазул гьабсагIат ругел нухмалъулел. Гьедин Старшиновас абуна Думаялъул ахирисеб данделъиялда.