Гьениб бахъун буго гьелъ МахIачхъалаялъул маххул нухлул вокзалалдаса билет босулеб букIин. Абулеб буго 23 январалъул къалъуда къватIие яхъинелъун Москваялъул Казаналъул вокзалалде босараб билет бугин гьебилан. Бадида цадахъ чIун видеоялда цо херав чиги рагIула.
Гьеб видео низам цIунулез Бадил эбелалда гуреб, гIицIго эбелалъул вацгIаласда бихьун буго. Эбелалъухъейин абуни гьанжегIагар гIурус миллаталъул чиясул гIадаб гьаркьидалъун цо чи кIалъан вуго жив Москваялдаса Георгий вугилан. Кинавниги Георгийги гурин гьев, Москваялдасаги гурин, МахIачхъалаялда, ФСБ-ялда (хIинкъи гьечIолъи чIезабиялъул хасаб хъулухъалда) хIалтIулев чи вугилан бицана ЭР-ялъе инсанасул ихтиярал цIунулей Фатима Тарасовалъ. ТIагIин цо иш бугин, амма гьелъул хIасил цIакъго квешаб ккезе рес бугин абун бугила гьев чияс ясалъул эбелалда. Гьединан Москваялдеги ун Бадица ахирги цо бакI кьвагьизабизе рес бугилан абурал пикраби низам цIунулел цогидал хIалтIухъабазги загьир гьарулел руго.
ЦерегIан саназ гьединго эбелгун цадахъ Унсоколо мухъалдаса МахIачхъалаялдеги ячIун тIагIун йикIана Марям Шарипова. Цинги нахъисел къояз кьвагьана Москваялда метро. Гьеб Марямил хIалтIи бугин лъазабуна низам цIунулез.
Дагъистаналда инсанасул ихтиярал цIунулел рахIатхун руго дагьалъ цебе ккараб гьединабго хIужаги ракIалде щун. Цо динияв хIаракатчиясул I5 сон барав вас вукIана тIагIун. Цинги чанго къоялдасан вачIана гьев. Жив гьудулзабахъ вукIанин, телефоналъул бухьен гьабизе бажарулеб бакIалда вукIинчIин абунин васасилан лъазабуна гIагарлъиялъ. Амма инсанасул ихтиярал цIунулезухъ руго цогидал баянал. Пуланал чагIаз викъизеги викъун, гьев вас хIинкъизавулев вукIун вугила Москваялде билетги босун бокьараб гьабун Дагъистаналдаса тIагIайин мунилан.
Инсанасул ихтиярал цIунулей Фатима Тарасовалъ бицунеб буго Бади Мирзабеговалъул ишалъулъги чанги ругин ричIчIуларел жал. Масала гьей яс тIагIун йикIиналда бан хъвараб гIарза букIанин низам цIунулезухъ 23 январалда. Гьезда бокьухъе кIолаанин гьеб къоялъул къалъуда поездалдеги яхун уней гьей ялагьизе. Масала, поездалде билетал росарал гIадамазда гъорлъ компьютералдасан гьелъул цIар балагьизе.
Фатима Тарасова: "ТIоцебего гьез гьабизе кколеб жо буго моргалдаги, маххул нухлул полициялдаги, кассаялдаги халгьаби. Гьелъ паспорт цадахълъидал босун ун бугеб. Гьедин гьабурабани, 23 январалдаго поездалдаса гъоркье лъугьинайизе кIолаан гьезда гьей".
Фатима гьединго бицана доб цебехун рехсараб вокзалалда бахъараб видеоялда Бадихъ кодоб ккун букIун бугила чIегIераб ххамги тIад жемараб кIудияб алат. Щибдила гьелъул магIна? Фатимал пикруялда рекъон, гьеб кколеб буго гIадамазда гьей ракIалда чIезайизелъун хасал чагIаз гьелъухъе кьураб къайи.
Москваялде цо бакI кьвагьизабизе хас гьабун Бади тIаса йищиялъе гIилла гьикъидал, Фатима Тарасовалъ абуна жинда чIванкъотIун гьелъие гIилла лъаларила. Амма нахъасан вахъине бихьинчи гьечIолъи батилила гьеб.
Бади Мирзабегова хIалтIулей йикIана жидерго рукъалъул тIоцебесеб тIалаялда жинцагоги эбелалъги рагьараб исламалъул къайи бичулеб тукада. Бадил эмен хун вуго гьей гьитIинаб мехалдаго, гьелъул гьечIо вац. Я эбелалъул гьечIо. Йиго гIицIго унтарай, загIипай кIодоэбел.
Фатима Тарасова: "Дида ккола цо гIиллалъун батилин нахъасан вахъине гьелъул чи гьечIолъи".
Фатима бицана Бади ун йигин тIад ретIунеб пальтоги тукада жийго гIодой чIолеб бакIида тIаде рехун. Гьединго тIагIиналде чанго къоялъ цебеккун Бадихъе тукаде низам цIунулезул хIалтIухъан вачIун вукIараблъи. Гьедин гьезул тукада хадуб халкквей чIезабун букIанин бицана ЭР-ялъе Тарасовалъ.
