Дагъистаналдаса «Евсюков»

Жанисел ишазул министерлъиялъул баяназда рекъон, "Тимур" абулеб кафеялда кваналел рукIарал бихьиназда гьоркьоб дагIба-рагIи ккун, гьел цоцалъ речIчIун рагъизе лъугьун руго.

Цинги гьел ратIа гьаризейин гьоркьов лъугьарав полициялъул хIалтIухъанасухъа ярагъ бахъизейин лъугьун руго гьел. Гьев кколев вуго МахIачхъалаялъул Советский мухъалъул полициялъул хIалтIухъан, капитан.

МухIамад (кафеялда аскIов гIумру гьабулев чи): "Феликс рагIула гьесда цIар. РечIчIун бугоха гьес, лъабалго чIван руго. Къацандизейищ ккарал, гьекъолелищ рукIаралали".

Жиндир цIар бицине разилъичIев полициялъул хIалтIухъанас ЭР-ялъе бицана гьев лъабавго дандечIей гьабизелъун полициялъул хIалтIухъан гьаваялдегицин кьвагьдон вугин, амма гьел гIодоруссун гьечIила.

Гьединлъидал байбихьуда гьеб информация къватIибе кьуна тIубан батIияб кIиго къагIидаялда. Дагъистаналъул жанисел ишазул министерлъиялъул баяназда рекъон, "Тимур" кафеялда аскIоса гIебеде бугеб бакIалъул хал-шал гьабулев вукIарав полициялъулас чIвана лъабго бихьинчи. Щайгурелъул гьез хIалбихьулеб букIун буго гьесухъа ярагъ бахъизе.

Цогидаб информациялда рекъон, полициялъул хIалтIухъан эркенго тира-сверулеб заманалда гьесда рагIун буго кафеялда жанир цо чагIи рагъулел рукIин. Гьел ратIа гьаризейин гьоркьов лъугьиндал, гIодоруссунеб хIал гьезулги букIинчIого кьвагьизе ккун буго гьес.

Амма лъабабго жаназаялъул хал гьабидал, хас гьабун гьезул щивасул ботIролъ речIчIун бугин лъазабулеб буго цIех-рех гьабулел цо-цо хIалтIухъабаз. Гьединлъидал цIех-рехалъул комитеталъул пикруялда рекъон, бицен гьабулеб чIвай-хъвей ккеялъе гIилла батизе бегьула цоцаздехун рокьукълъи букIин. Щайин абуни гьел киналго цоцада лъикI лъалел рукIун руго. Масала, чIваразул цояв вукIун вуго полициялъул хIалтIухъанасул цее йикIарай лъадул вац. Гьев чIварав лъабавго бихьинчи абуни МахIачхъалаялдаса Хасавюрталде гIадамал раччулеб транспорталда хIалтIулев вукIун вуго.

Гьеб хIужаялда бан баян кьолеб буго жанисел ишазул министерлъиялъул сайталдасанги. ГьатIанкъоялъул сардилъ "Тимур" кафеялда аскIоб ккараб кьвагьа-гIанхъиялъул цIех-рех байбихьанин хъвалеб буго гьениб. Нагагьлъун полициялъул хIалтIухъан гIайибияв вугин чIезабуни, гьев хIалтIудаса нахъе рехизе вугин, гьесда тIадехун ругел хIакимзабазе тамихIги гьабилин абулеб буго жанисел ишазул министерлъиялъул официалияб сайталда.

Къойилго гIадин хасал операциял тIоритIун, гIолохъаби чIванилан гуребги, гIадатиял гIадамазул ццим букIуна полициялъулазда гьез жидер бугеб ресалдаса цIикIкIун пайда босулеб бугилан. Масала, хъулухъги багьанадуй ккун, бокьараб такъсир гьабулеб бугила гьез, хадуб жидергун махщелцояз - низам цIунизе тараз - щибгIаги гIайиб биччалеб гьечIила гьезда тIаде.

Гьединго абула нормаялдасаги цIикIкIун къояз хIалтIизе тIамун, полициялъул хIалтIухъабазе рес кьолеб гьечIила хIухьбахъи гьабизе. Гьединлъидал гьез жидерго свакги, ццимги, цогидабги гIадатиял гIадамазда бецIулеб бугила.

Гьел рагIабазе нугIлъи гьабизелъун рехсезе бегьула Хасавюрталдаса адвокат Сапият МухIамадова. Гьей юхун йикIана полициялъулаз. Амма низам цIуунлезул пикруялда рекъон, Сапиятица жинцаго вухана полициялъул чанго хIалтIухъан.

Гьединго гъоркьисала октябралда полициялъул хIалтIухъабаз вухун гIадалнахуе жагъаллъи ккун, азарханаялда вегун вукIана Гъайирбег ГIабдулаев. "АхIулгохI" абулеб жамгIияб гIуцIиялъул нухмалъулев ккола гьев. Хъизангун цадахъ Казбек мухъалъул Дилималде берталъе араб бакIалда ккун буго гьеб хIужа. Амма жакъа къоялде щвезегIанги цIех-рех гьабулеб гьечIин жив вухарал полициялъулазин бицана ЭР-ялъе Гъайирбегица. Хасавюрталда цIех-рехалъул комитеталда бегун тун бугин жинда хурхараб материал, щибаб нухалъ ваккизе индал, багьа-багьанги батун живги тIовитIулин бицана гьес.

Гъайирбег ГIабдулаев: "Дун гьелда тIад хIалтIулев вуго. Прокуратураялъги цогидазги чIезавулев вуго дун... Гьезда хъвараб жо гьабизе цIакъ захIмат букIуна. Материал буго Хасавюрталда цIех-рехалъул комитеталда. Дов цIех-рехчи ахIдана живдила цIализе унев вугилан... Дица гьанже гьелда тIасан президентасухъеги Москваялдеги хъвазе буго".

БитIун 17 февралда МахIачхъалаялда миллияб библиотекаялде данделъун рукIана низам цIунулездасан къварилъи ккарал гIадамал. Хадубккун гьединал хIужабаздаса цIуниялъе гьабулеб-толеб дандбалел рукIана гьел.

Гьелдаго цадахъ гIадамазда гьоркьор цIилъана гьадинал харбалги.

МухIамад: "Жанисел ишазул министр вахъулев вугилан хабар букIана. Гьанже гьадинаб жо ккараб мехалда тIуванго вахъила гьев".

Гьеб хабар баккун букIана заманаялъ нухмалъи гьабизе Дагъистаналде Рамазан ГIабдулатIипов витIун вачIиндал. Жанисел ишазул министерлъун теялъе бищунго кIудияб рес МухIамад Хизриевасул бугилан биценги букIана. Гьев ккола УСБ абулеб бутIаялъул нухмалъулев. Гьелъул хIалтIухъабаз цIех-рех гьабула гьатIан къоялъ "Тимур" кафеялда жидер хIалтIухъанас гьарурал гIадал хIужабазул.

"Тимур" кафеялда полициялъулас лъабго чи чIваялъул хабаралдаго цадахъ рагIана гугарухъан Бахтияр АхIмадов лъукъун вугилан абураб хабарги. МахIачхъалаялда ортопедиялъулгун травмотологиялъул клиникаялда операция гьабуна гьесие. Гьесда речIчIараб жо чохьолъ щун бугоан.

Бахтияр АхIмадов ккола 2008 соналда Пекиналда рукIарал Олимпиялъул хIаязул гIарцулав призер. Машгьурав гугарухъан гуревги, Бахтияр АхIмадов бизнесчиги ккола. масала, "Караван" абун МахIачхъалаялда рагьарал тукаби гьесул руго.

Республикаялда гьеб кIиябго лъугьа-бахъин цоцада хурхинабулеб буго цо-цояз. Амма живго Бахтиярица абулеб рагIула ругъун лъачIого жиндихъаго речIчIун араб гуллица лъунилан.