АрбагI къоялъ тIобитIараб акциялде вачIарав Дагъистаналъул жанисел ишазул министр хисулев Баталиев АхIмадица лъазабуна гьеб ишалда хурхун цIех-рех ине бугилан ва гьелъие букIине кколеб къануналда рекъараб къимат кьезе бугилан. ГIадамаз жал нужеда божуларин лъазабуна гьесда.
Нугъай мухъалъул Терекли-Мектеб росулъ талат ва арбагI къоялъ 600 гIан чи вакIарараб митинг тIобитIана гьениб полициялъул бутIаялда 22 сон барав Эрадиль Асанов чIваялда разигьечIез.
ГIадамаз тIалаб гьабуна гIагараб заманалда жаниб гьеб такъсир гьабурав полициялъулав кквейин ва гьесда тIад такъсиргьабиялъул иш рагьейлиан.
Рустам ГIалиев: Гьаниб гIорхъолъа араб иш ккун букIиналъ ракIарун руго ниж гьанире. Гьаниб полициялъул бутIаялда жаниб, полициялъулазул цIураб бакIалда речIчIун жогун чIван вуго щибго гIайиб гьечIев вас. Гьев такъсир гьабиялда щаклъи букIун ккурав чи вукIинчIо, гьесде щибниги гIайибги гIунтIизабун букIинчIо, нугIлъунгицин вукIинчIо гьев. Гара-чIвариялъейиланги ахIун чIван реххун вуго гьев. Гьев чIварасда хъвазе ва цIализе лъалароан, гьев школалда цIалулевги вукIинчIо. Гьев вукIана киназего кумек бугев, лъикIав вас. Киданиги щивниги къварид гьавурав чиги гуро гьев. Нижее ритIухълъи чIезабизе къваригIун буго. Ниж сонги ракIарун рукIана гьанир. Нижер рукIине кколел суалал руго тIалъиялдехун ва къуваталъул идарабаздехун. Нижеца гьел сонги рорхун рукIана.
Эрадил чIварав чи жеги туснахъ гьавун гьечIо, гьесда тIад такъсиргьабиялъул ишги рагьун гьечIо. КидаллъагIан гьев гьедин тезе вугев? Чи чIван вуго, амма гьелда хурхун такъсиргьабиялъул иш рагьун гьечIо жеги. Нижер мухъалъул къуваталъул идарабаз кIиго сагIаталъ бахчана гьеб такъсир. Щай гьеб бахчараб? Гьев чи хвей тадсикъ гьабун гьечIо лъицаниги, хехаб кумек ахIун букIун гьечIо гьесде. Кибе балагьун бугеб нижер прокуратура ? Гьев вас чIварав чи щивали гьесул цIарцин бицунеб гьечIо нижеда.
Митингалда гIахьаллъарав дагъистаналъул жанисел ишазул министрхисулев Баталиев АхIмадица лъазабуна гьеб ишалда хурхун букIине кколеб цIех-рехги гьабизе бугила, къануналда рекъон хIукмуги къотIизе бугилан.
Баталиев АхIмад: «Аслияб жо буго, гьанир ракIарун ругездаги гьечIездаги бичIчIизе ккола лъица щибилан абуниги гьаб лъугьа-бахъиналда хурхун къануналде данде кколеб хIукму къотIизе буго нижеца. Жанир тIамизе кколел ратани, жанир тIамила, кввезе кколел ратани кквела, хIажалъи ккани цойгидал тадбиралги тIоритIизе руго. Кинабго къануналда рекъон букIине буго».
Министрхисулев кIалъан вахъинегIанцин чIечIого митингчIагIаз ахIи бахъинабуна. Гьез лъазабуна жал къуваталъул идарабазда божуларилан. Гьединлъидал жидер тIалабал нужеца кIвараб гIан хехго тIурачIони, жидеца акциял гьоркьоса къотIизе тезе гьечIилан.
Салават Джаферов: «Жакъа министрхисулес абулеб буго гьев чи кквезеги вугила гьесие тамихIги гьабизе бугилан. ТIоцебесеб суал буго — щай гьев жеги ккун гьечIев ? Дуца жакъа абулеб буго гьеб ишалда хурхун букIине кколеб хIукуму къотIизе бугилан. ЛъикI буго, ниж гьеб хIукмуялъухъ балагьун чIела. Бокьарав чиясда кIолеб жо гуро гьеб чиясдаги речIчIун, щибго жо ккечIеб гIадин гьаниса ине. Гьелъ бихьулеб буго гьев чиясда нахъа чагIи рукIин. Гьелъухъ балагьун течIого букIинекколедухъ гьелъул цIех=рех гьабизе тIалаб гьабулеб буго нижеца. Гьелда хадуб жамгIияб халкввей гьабун бажаризе букIине, добе анибе кьечIого гьеб такъсир гьабураб бакIалда гьаб нижер мухъалдагоги тун гьабе гьелъул цIех-рехги. Гьев чIварав вас ккураб мехалда гьесухъ кодоб кинабгIаги ярагъ букIинчIолъи тадсикъ гьабизе биччанте гьев ккурал полициялъул хIалтIухъабазги. Гьев полициялде вачун вачIараб мехалда кIалтIа чIун вукIарв дежурныясги».
МитингчагIаз тIалаб гьабулеб букIана гьеб такъсир гьабурав чи жидеда щивилан бицейилан. Жидеда гьесул хIакъалъулъ лъалеб жо бугила гьев 32 сон барав подполковник вукIин, тIокIаб щибго жо лъазе толеб гьечIила, щиб гьабунги низамцIунулез жидерго чи цIунулев вугин абун разигьечIого руго гьел. Гьезул тIалабалда рекъон Баталиевас Асанов чIварав полициялъул хIалтIухъан щивали бицана.
9 октябралъу бакъанида лъагIан гьев вас чIварав чиясда тIад такъсиргьабиялъул иш кида рагьулебали жидеда лъазабичIони жидеца цIидасан дагьавги гIемерав чи данделъараб митингги тIобитIизе бугила, федералияб нухги кквезе бугилан лъазабуна акциячагIаз.
