Марталъул ахиралда МахΙачхъалаялъул Миллияб библиотекаялда тΙобитΙана МухΙамадов Мурадица хъварал гΙараб каллиграфиялъул экспозиция. Гьесул 50 хΙалтΙуе къимат кьурал экспертазул пикруялда, авторас жиндаго цебелъураб масъала тΙубазабун буго щвалде щун. Диналъ чΙагояб жоялъул сурат бахъизе гьукъун букΙиналъ, гΙарабазул ракьалда бижараб махшел загьир гьабулаго, диниял гΙорхъаби гьесги рахун гьечΙо. ГΙараб хΙарп-рагΙабаздалъун гьес вихьизавун вуго Имам Шамиль, как балел гΙадамал ва цогидаб. Экспозициялде щун йикΙана нижер мухбир Зульфия ХΙажиева.
