Къварилъи ккаразе компенсация кьезе байбихьана

ТIоцебесеб иргаялда гIарац кьезе буго бищунго цикIкIун къварилъи ккарал къватIазда гIумру гьабулезе. ГIарац щвезе бокьараз хъвазе ккола Дербенталъул гIорхъолъа рорчIарал ишазул идараялде гIарза, паспорталъул копия ва гIарац тIамулеб банкалъул счеталъул реквизитал. Шагьаралъул администрациялъул нухмалъулев хисулев Сергей Азимовас бицухъе, къварилъи ккарал гIадамазул дагIба-рагIи роцIцIине ва цоги гьезда бичIчIулареб ахIвал-хIал бугони гьелъие квербакъиялъе гIоло гIуцIизе буго хасаб комиссия. Администрациялъул нухмалъулез гьарулеб буго гIадамазда гIарцуда аскIоб ахIи-хIур бахъинабугеян, гьеб жиндир заманалда щвезе бугин киназего. Цогидал гIиси-бикъинаб къварилъи ккарал гIадамазе гIарац кьезе буго хадуб.

Кьолеб гIарцул къадар бараб буго гIадамазе ккараб къварилъиялда. Дербент шагьаралъул гIадамал социалияб рахъалъ хьезариялъул централъул нухмалъулей Терещенко Людмилаца бицухъе, гIаммаб къагIидаялъ гьабсагIаталда къварилъи ккаразул къадар бахъун буго гIага-шагарго 6 азарго чиясде. Къварилъи ккарал рикьун руго лъабго батIияб категориялде. ТIоцебесеб ккола жаниб гIумру гьабизе бегьулареб хIалалда тIубанго рукъ ва магIишат щущазабурал, кIиабилеб категория ккола бащдаб магIишат биларал ялъуни рукъ биххарал, ва лъабабилеб категория ккола дагьаб къадаралъ жидее къварилъи ккарал. Бищунго цебе гIарац биччалеб буго бищун цIикIкIун къварилъи ккаразе, хутIаразе хадуб кьезе буго.

Къварилъи ккараб къоялдаса нахъе Дербенталда хIалтIулеб букIараб «Гражданияб корпус» абураб волонтеразул къокъаялъул штабалъул нухмалъулей Дибирова Луизал баяназда рекъон, гIадамазе къварилъиялда рекъараб къимат кьунгутIиялъул хIужаби рукIана цереккун. ГIарац кьолаго проблемаби раккиялъул хIакъалъулъ жеги лъалеб жо гьечIо.

Дибирова Луиза: «Жидее къварилъи ккаралги, журналисталги церегоялдаса нахъе балагьун чIун рукIана кидадай гIарац кьезе байбихьизе бугищали, гьале жакъа кьезе байбихьизе бугилан лъазабуна администрациялъ. ГьабсагIаталда гIарац кьолаго проблемаби ругищали дида жеги лъалеб гьечIо, рагIичIо щибниги. Гьел рукIине руго, мухIканго кинабго лъазе буго кIиго къойида жаниб, щайгурелъул жакъа гурони хIалтIи байбихьун гьечIо. Документал кьолаго рукIана проблемаби къварилъи ккаразул. Мисалалъе, ШиххIасанов Кахриманил рукъ тIубанго щущан буго, живгоги хъизангун вацасухъ гIумру гьабун вуго, амма гьесие дагьаб гурони къварилъи ккечIилан чIезабун буго комиссиялъ. Гьеб битIун гьечIо, щайгурелъул дида бихьана гьесул рукъ, гьеб тIубанго щущан буго. Гьел документазда рекъон гIарац босизе ани гьесие кьела бащдаб рукъалъул гIарац. Гьеб кинабго законалда данде кколаро дир хIисабалда. Гьеле гьединал проблемаби руго Дербенталда».

Гьей йикIана «Гражданский корпус» абураб Дербенталда хIалтIулеб волонтеразул къокъаялъул штабалъул нухмалъулей Дибирова Луиза.
Живго ШиххIасанов Кахриманица ЭР-ялъе бицана Дербент шагьаралъул администрациялъ хIаракат бахъулеб бугин гIарац кколелдаса дагьаб кьезе киназего.

ШиххIасанов Кахриман: «Октябралда букIараб тIабигIияб балагьалъул хIасилалда дин кинабго рукъ биххана, магIишатги щущана. Дир кодор киналго къваригIарал документалги руго, рукъалъул документалги руго. Дица кьолел документазухъ администрациялъ гIинтIамулеб гьечIо, гIарацги жеги биччан гьечIо, тIоцебе киназего кьолеб букIараб 25 азарго гъуруш хутIун.

Администрациялда дида абун букIана дица дир хъизан чIезе ккураб рукъалъухъ кьолеб гIарац бецIизе бугин, хважаинасулгун къотIи-къай гьабураб кагъат босун вачIаян. Дица гьеб кьуна, амма гIарац 3 моцIалъул гурони кьечIо, октябралдаса нахъе 7 моцI аниги.

Гьебги хIисабалде босун, дица шагьаралъул нухмалъулев Имам Яралиевасухъе гIарза хъван букIана, дие ккараб къварилъиялъе къимат кьолеб хасаб комиссия гIуцIеян, амма гьебги гIуцIун бахъинчIо. Гьанже дица адвокатги ккун, документалги ракIарун диваналде гIарза кьолеб буго. Дун рази гьечIо дие гьез кьолеб компенсациялдаса. Дир буго 150 кв. м. рукъалъул, гьезул документазда рекъон дир рукъалъул букIун буго 72 кв. м. ва гьелда рекъон кьолеб буго гIарац. Гьединлъидал, дица диваналде гIарза хъван буго».

Жидее кьолеб гIарцул къадаралдаса разилъи гьечIолъи загьир гьабулеб буго жеги чанго чияс. Гьезул баяназда рекъон, ккараб къварилъиялъе къимат кьолеб комиссиялъ цIакъ гIемерал гъалатIал гьарун руго. РитIухълъи чIезабизе кIвечIони диваналде ине къасд буго гьезулги.