МахIачхъалаялъул цIияв нухмалъулев Муса Мусаевас ва гьесул сверухълъиялъ бачIинахъего байбихьана шагьаралда гIадлу гьабизе ккеялъул бицине. Аслияб къагIидаялъ гьез кIвар буссинабулеб буго шагьар цIун бугеб бакIаричIеб, нахъе босичIеб кьищни-къулалдеги изнугьечIого ралел ругел бакIаздеги. Гьел суалазда гьоркьоб цойги МахIачхъалаялъе кIвар бугеб суалги борхана гьез.
ХIалтIуде тIамун кIиабилеб къоялде цIияв мэр хисулев ГIабдулмуъмин Ибрагьимовас шагьаралда гьабураб халгьабиялдаса хадуб бищун цебе лъазабуна МахIачхъалаялда ахIуд биччан, тIалаб гьечIого сверулеб бугеб боцIуеги гьелъул бетIергьабазеги гIадлу гьабизе кколилан.
Гьедин къватIахъ сверулеб батараб боцIи гьанже кквезеги ккун хасаб бакIалде щвезабизе бугин ва гьелъул бетIергьабазда тIад гIакIа къотIизе бугин бицана «Эркенлъи» радиоялъе МахIачхъалаялъул администрациялъул пресс-хъулухъалъул хIалтIухъан ГIалимирзаева Зайнабица.
ГIалимирзаева Зайнаб: «Шагьар кьищни-къулалъул гурониги, боцIулги цIун буго. ГIемерисеб нухалда кьищни балеб бакIазде тIаде руссун рукIунел руго гьел. Гьединлъидал шагьаралъул нухмалъиялъ хIукму гьабун буго къватIахъ батараб боцIи хасаб гьезие гьабураб штарфстоянкаялде щвезаризе.
БетIергьабахъа гIакIа бахъун гурони гьел нахъеги риччазе гьечIо гьениса. Нагагь гьеб гIакIа кьеларилан чIарал чагIи ругони гьеб боцIи хъвезеги хъун бесдал лъималазе бикьизе буго. Гьедин гьабуни гурони гIадлу лъугьунеб хIал гьечIо шагьаралда».
Гьединго Зайнабица лъазабуна гьеб боцIул бетIергьабазда кигIан гIакIа къотIилебали жеги чIезабун гьечIила, мэриялъул юристал гьеб суалалда тIад хIалтIулел ругилан. Гьеб гIакIа гурониги боцIул бетIергьабахъа бахъизе бугилан бицана гьелъ боцIцIи кколаго гьарурал харжал ва гьел штарфстоянкаялда чIезарун ругебгIан мехалъ гьел кваназарулаго ва тIалаб гьабулаго арабщинаб гIарацги.
Шагьаралда тирулел рукIунел гIачиязда ццин гIадатиял гIадамазул гурониги тIубарал идарабазулги буго. Масала, гьеб боцIул бетIергьабазе кьварараб гIадлу гьабизе кколин лъазабуразда гьоркьор рукIана бищун цере МахIачхъалаяда
гъветI-хералъул иш роцIцIинабулеб «Горзеленхоз» абулеб гIуцIиялъул хIалтIухъаби.
Гьез лъазабулеб буго гIемер къоги бихьун жидеца къачIарал шагьаралда ругел тIугьдул чIарал бакIалги, ахалги, газоналги хвезарун ратулила гьеб боцIуца. Гьенир чIарал, гIезегIан гIарацги кьун росарал гъутIби хъарсун рахъваялде ккезарун рукIунила гьелги. «Горзеленхозалда» цадахъ гьебго боцIул суал борхулеб буго МахIачхъалаялъул коммуналиял хъулухъазул бутIаялъги. Гьез чIезабизе ккола шагьаралда рацIа-рахъалъи. Гьез лъазабулеб буго кьищни-къул бугеб бакIалдаса дагьабниги гьеб нахъе босизе кватIани гIачияз гьеб сверухъ мухъалдаго щущазабун батулила гьеб.
Гьел цIун гьечIониги кьищни балел къалазда жаниб тIинда бугеб цо-кIиго къвачIагицин къватIибе бахъизе ругьунлъун ругила гьел, гьеб мехалдаги гIураб чороклъи букIунилан лъазабулеб буго гьез. Гьебго суалалъ рахIатхвезабуразда гьоркьоб буго нухазул полицияги. Гьезул пресс-секретарь ГIисамухIамад СултIановас лъазабулеб буго къватIахъ сверулел гьел гIачиязе гIоло чанги автоавариял кколилан.
Гьадингоги къваридал шагьаралъул нухазда, гIемерлъун бугила транспортги, гIадамазецин берцинго хьвадизе санагIалъи гьечIила, гьезда гьоркьор хьвадулеб боцIуцаги чанги квалквал гьабулилан.
Тохтурзабазги эпидемиологазги лъазабулеб буго гьеб шагьарсверун кьищниги кун бугеб боцIуца кьурал нигIматал кванаялъ гIадамазда унти ккезабизе рес бугилан. Дагъистаналъул медицинаялъул академиялъул рахунел унтабазул ва эпидемиологиялъул кафедраялда хIалтIулей тохтур ГIумариева Иринаца «Эркенлъи» радиоялъулгун букIараб гара-чIвариялда абуна гьединаб боцIуца кьурал нигIматал ричулел чагIи туснахъ гьаризе кколилан.
Ирина ГIумариева: « Гьел кидаго кьищни-къул бараб бакIалда кваналел рукIуна. Кванил нигIматал гурониги гьениб батанщинаб жо чIамула гьез, кIалхъвачIеб чороклъиги толаро. Гьез хвезабулеб буго санитарияб рукIа-рахъин.
Гьеб гурониги шагьаралда жаниб ахикь яги нухлул рагIалда бугеб гIурччинлъи квананигицин гьеб боцIул нигIматал хIалтIизаризе бегьуларо гIадамаз. Щай гурелъул транспорталъул кIкIуйги, хIурги, гIемерал химикаталги рукIуна шагьаралда, гьеб кинабго тIадчIараб хер-чIахI кванараб боцIул рахьдалъаги гьаналъаги гьеб кибениги унаро.
Гьединал боцIул бетIергьабаз жидецагоги хIалтIизабуларелъул гьел нигIматал, аслияб къагIидаялъ гьез гьел ричула. Лъан гIадамасе зарал гьабулел нигIматал ричулел гьел чагIазе, дир пикруялда рекъон, уголовияб тамихI гьабизе ккола.
Нилъер гIадамазулги бичIчIигьечIолъи буго гьеб бакIалда. Гьезги ричун росулел руго гьезул нигIматал, гьезул бугеб зарал лъазе ккола щивав чиясда. Заралияб гуреб жо гьезда гъорлъ, кингIаги гьел хIалтIизарун бажарулеб».
Шагьаралъул администрациялъ лъазабухъе гьеб боцIуе гьарурал штарфстоянкабазда гьаб сагIат 40 бетIералъениги бакI буго. ХIажалъи бугони гIагараб заманалда дагьалги гьединалго бакIал рагьизе ругинги лъазабулеб буго мэриялъ.
