Принцип цlунун жаний ккурай

Терроралда данде чIараб комитеталъул баяназда рекъон, гьезул рокъоб чIухь балелъул ратун руго шагьидлъизе бокьараз жидедаго тIад ххолел рачалаби. КIиябго рачелги жанисан тротилалъул 200 граммалда бащадаб къуваталъул кьвагьулеб жоялъ цIезарун рукIун ругилан. Амма яцазги гIагарлъиялъги гьелдаса инкар гьабулеб буго.

ПалхIасил, исана июналъул байбихьуда Абакаровазул рокъоб чIухь бан гьел рачалаби ратанин абун хадур яцал жанир лъуна. Гьезул эбелалъгун адвокатас ахIи балеб буго Сабинае туснахъалъуб гIакъуба кьолеб бугилан. Амма гьанжегIагар Сабинахъе туснахъалъуве щварав ХIасан Айгумовасда гьединаб щибниги жо халлъун гьечIо. Айгумов ккола туснахъ гьаруразда хадуб халкквезе гIуцIараб жамгIияб комиссиялъул Дагъистаналда вугев вакил. Гьадин бицана гьес ЭР-гун букIараб гара-чIвариялда.

ХIасан Айгумов: «Киназго бицунеб бугин мун туснахъалъуй юхун йикIиналъул, дур гьурмада яги черхалда гIуж-куцго гьечIо гурищин гьикъана дица гьелда. Гьеб мехалда гьей гьимана, лъицаниги махсара гьабун батилилан. Кинаб махсара букIунеб, гъоле гъоя къватIийги чIун дур эбел гIодулей йигин абуна дица. ПалхIасил, гьелъ дие щибниги бицинчIо. Хадув дун дандчIвана туснахъалъул нухмалъулевгунги. Нагагьлъун Сабинаца гIарз бахъарабани, гьелъул хIакъалъулъ гьесда абизеги рес букIана дир. Амма цо чанго къоялдасан гьелъул адвокат лъугьана Сабина Абакаровалъе туснахъалъуб гIакъуба кьолеб бугилан бицине. Гьелда кIун гьечIин дуда гьеб бицинеян абуна гьес дида».

МахIачхъалаялъул тIоцебесеб СИЗОялъул хIалтIухъабаз бицухъе, Сабина Абакаровалда лъицаниги кьабичIо, гьезул хIалтIухъабазулгун гьелъул дагьа-макъабго дагIба-рагIи ккун гурони.

Хас гьабун яцал ПатIиматгун Сабина Абакаровал гьединаб ишалда гъорлъе ккеялъе гIилла, тIоцебесеб иргаялда, гьел салафиязда хадур рилълъунел чагIи рукIин батилин рикIкIунеб буго ХIасан Айгумовас. Гьединаб пикруялъулги ретIа-къаялъулги руччаби шагьаралда цоцада лъалел ругила. Гьедин гьезда лъалей йикIун йиго гъоркьисала 3 маялда МахIачхъалаялъул рагIалда «Аляска» посталда теракт гьабурайин полициялъ рикIкIуней Муслимат ГIалиева. Гьеб мехалда I4 чи хвана, нусгояв лъукъана.

Байбихьуда низам цIунулез абулеб букIана яцал Абакаровал рукIанин гьеб бакIалда теракт гьабурав кIиго чиясул лъудби.

Абакаровазул рокъор ратаралин абулел рачалаби чIухь балел рукIараз жидецаго реханин жидер рокъореян абулеб буго гьезул эбелалъ. Амма гьабсагIаталда гьезул кинал ритIарал, кинал мекъалали абизе кIолеб гьечIо Айгумовасдаги. Гьеб хIужаялда хурхун низам цIунулезухъ кинал далилал ругелали лъалищин гьикъидал, ХIасан Айгумовас гьадин жаваб кьуна.

ХIасан Айгумов: «Изну гьечIого яргъид гIуцIаразулгун бухьен бугилан яцал Абакаровазде гIунтIизабулеб букIараб гIайибалъул хIасил ккечIо».

20 августалда МахIачхъалаялъул Советский мухъалъул диваналъ Сабина Абакарова жеги кIиго моцIалъ туснахъалъуй чIезайиялъул магIна цIех-рехчагIи жидерго принципги ккун чIолел рукIин батилин абулеб буго ХIасан Айгумовас. Щайин абуни гьезул ццим бахъинабун батилила жинцаги адвокатасги гьеб хIужаялда тIасан прессаялдасан ахIи-хIур бахъинаби. ЦIех-рехалъул материал цебего битIизе кколеб букIун буго МахIачхъалаялъул Кировский мухъалъул цIех-рехчагIазухъе. Гьеб жеги щун гьечIо. Гьединго Абакаровазул рокъоб чIухь бан араб кIиго моцIидасан цIех-рехчагIазда ракIалда рагIула наркотикалги ратанилан гьезде цIияб гIайиб гIунтIизабизе. Гьелда бан жибго ЦIех-рехалъул комитеталъ кинабгIаги лъазаби гьабулеб гьечIо. Гьедин бицунеб буго гIицIго Абакаровазул гIагарлъиялъ.