Кремлалъ нахъ чIвана Сириялда азарханаялда авиакьабиял щвезабиялъул гIайибал ва ахIана гьелда хурхун официалияб Дамаскалъул лъазаби ракIалде босиялде.
Россиялъул президентасул пресс-секретарь Дмитрий Песковас лъазабуна, Москваялъ жиндаго гъоркь мухIканаб кьучI гьечIел, чIорогосел гIайибал къабул гьаруларин. Гьединал гIайибал гIунтIизарун хадуб щибаб нухалда, гьез кинал гIаги далилалги рачунарин.
Цолъарал миллатазул гIуцIиялъул информациялда рекъон, итни къоялда шималияб Сириялда бомбабазул къурбаналлъун лъугьун вуго 50 гIадатияв чи. ООНалъул генералияв секретарь Пан Ги Муница лъазабуна, авиакьабиязул хIасилалда зарал кканин бищун дагь босун, щуго азарханаялъе, гьездаго гъорлъ, «ГIорхъаби лъаларел тохтурзаби» абураб халкъаздагьоркьосеб гIуцIиялъеги, ва кIиго школаялъе.
Авиакьабиязе квешаб къимат кьуна Евроцолъиялъги Цолъарал Штатазги.Сириялъул оппозициялъул ракI чIараб буго гьел кьабиял Россиялъул авиациялъ щвезарурал рукIиналда. Москваялда вугев Сириялъул вакил Риад ХIаддадица бомбаби раялъул жавабчилъи лъолеб буго Цолъарал Штатазул ва гьезул партнеразул гьаваялъул къватазда.