Пушкар Гуравил жаназа гьабсагIатги жеги моргалда буго. Гьев хун вуго ункъабилеб августалда рекIел унтиги бачIун, медакадемиялъул цадахъго гIумру гьабулеб минаялъув. Гьеб кIиабилеб нух букIун бугин гьесде рекIел унти щварабилан бицана «Эркенлъи» радиоялъе Пушкар Гурав лъалев вукIарав ГIимраница. Дагъистаналъул медицинаялъул академияги лъугIун гьабсагIат тохтурлъун хIалтIулев вуго гьев. Пушкар Гурав Ставрополалда бугеб медицинаялъул институтги лъугIизабун вачIун вукIун вуго МахIачхъалаялъул медакадемиялда ординатура лъугIизабизе. Гьал къоязда гьес кьезе кколеб букIун тIоцебесеб экзамен. Гьанже гьесул жаназа ватIаналде битIизе гIарцудалъун кумек гьабизе инкар гьабунин медакадемиялъул нухмалъиялъилан бицана ГIимраница
ГIимран: «Гьез абулеб буго гьев жидер студент вукIинчIилан. Ординатураялда цIализе Пушкар Гурав гьезги ахIун вачIун вукIана, жакъа экзамен кьезе кколаан гьес. Гьезул общежитиеялда жанив гIумру гьабунги вукIана, гьезул студент ккола гуриш гьев? Нижеца гьезда абуна чи хун вугин, гьесул жаназа ватIаналде битIизе къваригIун бугин гьеб гIарацилан, жидер гIарац гьечIилан инкар гьабуна деканаталъ. Проблемаби руго цогидалги. Нижее къваригIун букIана гьесие гьадинаб къварилъи кканилан абураб справка. Гьеб справка тIвалаб гьабула аэропорталда гьесул жаназа битIулеб мехалъ. Гьеб тIалаб гьабизе ана дун нолъ къаси сагIат анцIила кIиго тIубараб гIужалъ Советский мухъалъул полициялъул идараялде, кьечIо, метер радал вачIайилан абуна. Жакъа радал индалги кьечIо гьез батIи-батIиял багьанабиги рачун, гьеб справка гьечIони Дагъистан къватIибе бахине кIвезе гьечIо нижеда».
Хаварасул эбел инсуда пашманаб хабар лъазабун буго. Гьесул эбел захIматаб хабар лъан хадуб сах гьечIого йигилан бицана ГIимраница
Москваялде щвезегIан Пушкар Гурав нухарегIизе хIажалъулеб буго 15 азарго гIанасеб гъурущ, гьенисан Индиялде инеги гIемераб гIарац къваригIунеб буго. Къокъ гьабун абуни нусго - нусиялда анцIазаргониги гъурущ къваригIинехъин бугин, дагь-дагьккун гIарац бакIарулеб бугилан абулеб буго ГIимраница..
Дагъистаналъул миграционныяб хъулухъалда «Эркенлъи» радиоялъе абуна, чIагоял гIадамазулгун гурони, хварал мигрантазулгун жидер идараялъ хIалтIи гьабуларилан, гьединлъидал Пушкар Гуравил жаназа ватIаналде нухарегIизе жидеца гьабизе бегьулеб кумек гьечIилан.
