Гьесде гIайиб гIунтIизабулеб буго «Авито» сайталдасан лъазабиги гьабун, гьес видеокамераги тIад бугеб сагIат бичулеб букIунилан.
Гьебин абуни шпионазул алатлъун рикIкIунеб буго цIех-рехчагIаз. Гьедин гьеб сагIаталъул хасаб экспертиза хIинкъи гьечIолъи чIезабиялъул федералияб хъулухъалъул лабораториялда гурони гьабизе бегьулеб гьечIо.
Гьеб ишалъул хал гьабулеб буго гъоркьисала декабралдаса нахъе.
ПалхIасил, адвокат ПатIимат ГIабдулаевалъул рагIабазда рекъон, Ислам ГIабдурашидовас гьеб сагIат базаралдаса босун букIун буго. Цинги «Авитоялда» лъазаби гьабун буго. Гьелдаса хадур сагIат босизе къваригIарал чагIазул ххвелги гьабун, гьесухъе рачIун руго «К» централдаса цIех-рехчагIи. Цин жинда ракIалде кканин гьез махсара гьабулеб батилин, божулев вукIинчIила ГIабдурашидов. Дуца гьабураб жо такъсир бугин гьез абидал, гьев мукIурлъун вуго гьелъие. Амма адвокаталъ абун буго ГIабдурашидов мукIурлъанинха сагIат бичизе сайталдасан лъазаби гьабулеб мехалда гуреб, гьесда гьелъул хIакъалъулъ низам цIунулез бициндалин.
«Изну гьечIого хасал техникиял алатал рича-хиси" абураб статья баккун буго 2011 соналда. Амма гьелъул хIакъалъулъ баян лъалев чи къанагIатги гьечIин бицана ЭР-лъе адвокат ПатIимат ГIабдулаевалъ. Гьелъ цIунулев Гъизляр мухъалдаса Ислам ГIабдурашидовасде гIунтIизабулеб буго гьединаб гIайиб.
Ислам ГIабдурашидовасдего гIадин тIири щвезе бегьулел чагIи чанги ругин Дагъистаналдаян рикIкIунеб буго адвокат ПатIимат ГIабдулаевалъ.
ПатIимат ГIабдулаева: «Дуда лъалебани, гьанже цIацIазе ругелщинал гIадамал. Дица гьаб иш тIаде босун букIин лъайдал, цо цIех-рехчи кIалъан вачIана дихъе МахIачхъалаялдасан. Жидер хIалтIудаса чанги чи нахъе реханила гьединалго видеокамерабиги ругел сагIтал ран ратун. Гьединлъидал гIемерисезда щибниги лъалеб гьечIо гьелъул хIакъалъулъ. Дица дирго студентаздаги абула цIодорго рукIайин. Гьел лъугьуна реццардизе, камерабиги ругел сагIтал ругин жидеда тIадилан. МахIачхъалаялда гьединаб гIиллаялъе гIоло къогоялде гIагарун чиясда тIад цIех-рех гьабулеб бугин бицана коллегабаз. Россиялдани гьелда хурхун бахъараб ахIи-хIур гьанже гIодоцун буго, нилъер гьаниб гьанже байбихьун бугоха».
Адвокат ПатIимат ГIабдулаевалъ ЭР-лъе бицана гьанжелъагIан гьединаб ишалъулгун кинабгIаги лъай-хъвай букIинчIин я юристазул, я адвокатазул, яги прокуроразул. Рес бугин бокьарав чияс эркенго гьединал техникиял алатал бича-хисизе. Цинги дуца такъсир гьабунилан цо къоялъ цIех-рехалъул чагIиги раккун рачIине рес бугилан абуна адвокаталъ. Гьединго кканила Гъизляр мухъалдаса Ислам ГIабдурашидовасулги. Жинда лъалароанин видеокамерабиги бугеб сагIат бичизе бегьунгутIиян абулеб бугила гьес.
Масала, адвокат Сапият МухIамадовас абуна туснахъ гьавурав чиясе гIакъуба кьолеб бугищали балагьизе уней жиндие рес букIунарила я диктофон, я сурат рахъарал аппарат, яги гьелда релълъараб жо жанибе босизе. Гьедин батани, жинца щибинха гьабизе кколеб, видеокамера бугеб гьединаб сагIат яги ручкагIаги гьечIони. Туснахъ гьавурасда ругел гIужал рахъизеги кколеб бугони. Гьединлъидал гьединал алатал гIицIго шпионазулин рикIкIине кколарила, гьезул бугила чи живго жинцаго цIуна-къаялъул мурадги.
