Бостоналда марафон унеб мехалда гьабураб теракат хIадур гьабиялда бан гIайибиявлъун рикIкIарав Жовгьар Царнаев чIвазе къотIи гьабизе ихтияр букIана 17 гIайибалда бан, ян абулаан юристаз. ГIаммаб къадаралда гьесда чIван вуго 30 гIайиб.
Гьа баразда цебе букIана гьадинаб масъала: щивас хасаб анкетаялда жавабал кьуна – жив разияв вугищ-гьечIищали гьаб, ялъуни доб гIайиб чIвазабизе Царнаевасда. ГIадахъ росизе кколааан прокуроразулги адвокатасулги пикраби. Ахир-къад киналго жавабал хIисабалдеги росун, рикIкIен гьабуна диваналъ.
Диванчи О`Тулица гьа баразул данделъи байбихьизегIан лъазабуна, тIаса-лъугьине рес кьолеб цо гIаги тIокIаб хIужа батани, цо чанго бакIаб гIайибалдаса цIикIкIараблъун рикIкIине бугин гьеб. Гьедин ккарабани Жовгьар гIумруялъго жаниве тIамилаан.
Гьадинаб буго Цолъарал Штатазул къанун. Гьеб процедура къабул гьабун букIана Америкалъул ТIадегIанаб диваналъ 1976 соналда.
Жовгьар Царнаев прокурораз гIайибиявлъун рикIкIана гIадамал чIвазе къасд гьабиялда ва гьел сакъаталлъун гьариялда бан. Гьес цебеккунго тIаса рищун рукIанин жалго жидецаго цIунизе рес гьечIел гIадамал , ай – лъимал, руччаби, ва ярагъ гьечIел. Гьединлъидалийн гьесул мурад унго-унгояб террористикияб букIанин.
27 хIалтIул къоялъ халат бахъараб диваналъ гIадахъ босана 154 нугIзазул рихьизариял ва далил. Царнаевасул ихтиярал цIунулез ахIарал нугIзазул къадар гьитIинаб букIун буго.
Адвокатаз абулаан Жовгьарил бербалагьиялъе асар гьабунин гьесул кIудияв вац Тамерланица ва гьев кколин аслияв такъсирчи, теракт хIадур гьабурав. Тамерлан полициялъулаз речIчIун чIвана гьев лъутулеб мехалда.
Диваналдехун руссун, Жовгьарие лъикIаб къимат кьолеб букIана гьесул щуго гIага-божараз ва мактабалъул мугIалимзабаз. Масала Трейси Гордоница.
Адвокатаз диванчагIазда цебе лъуна жиндир заманалда Жовгьарие алгебраялъул дарсал кьолев мугIалимлъун вукIарав Эрик Таубил кагъат дов тIадегIанаб цIалул идараялъул абитуриентлъун вукIараб мехалда. Царнаев вугин цIакъ гIакъилав, сабруяв ва гIамал лъикIав цIалдохъан, ян хъван букIана мугIалимас.
Гьеб гуребги, адвокатаз диванчагIазде бихьизабуна Жовгьарил эмен Анзор Царнаевасул унтул бицунел документал. Гьесул цо-цо психикиял хиса-басиял ругин ва гьеб унтиялъ Жовгьарие квешаб асар гьабунин лъимерлъиялъул заманалда.
Масаъала 2012 соналда Анзорги Жовгьарил эбелги ратIалъана. Тамерлан гьелдаса нахъе Жовгьарие кканин эмен киннигин. Аммаила, тIаде жубана адвокатаз, гьес Жовгьарие квещаб тарбия кьун бугин.Тамерлан хадуб радикалиял исламиистазул бербалагьби къабул гьабунин батIи-батIиял интернет сайтаздаса.
2012 соналда Дагъистаналда Тамерланицагун лъай-хъвай гьабурав Карташов Махамадица ФБР-алъе лъазабуна, Тамерлан гьенив вачIун вукIанин жигьадалда гIахьаллъи гьаби мурадгун. Амма гьесда щибниги бичIчIулеб ва гьабулеб букIинчIо. Гьес гIицIго интернеталда видеоялъухъ хал-щал гьабулеб букIанин, абуна Карташовас ФБР-алъул хасал хъулухъчагIазде.