Хеда Сатаровалъ абулеб буго жийго бахIарай талихIай йигин ва жий росасе инехъин йигин жиндиего бокьухъин.
Амма «Новая газетаялъул» мухбир Елена Милашинил батIияб пикру буго. Гьелъул баяналда рекъон Гойлабиевалъул рукъоб кинабгIаги хIадурлъи унеб гьечIин ва гьелда лъаларин кида бертин букIине бугебали. 29 апрелялда Милашиница телефоналъ ахIана Ножай-Юрт мухъалъул жанисел ишазул бутIаялъул бетIер Нужуд Гучиговасухъе.
«Дида ккола хасго гьелдаса нахъе яс рукъоса ячун йигин, магIар гьабун», - ян тIаде жубана Милашиница.
Дагьалъ цебе республикаялъул бетIер Къадиров Рамзаница лъазабуна гьеб хIужаялда тIаса дагIба багъаризабунин пуланал «либералаз». Прессалда бахъараб дандерижи гьес рикIкIунеб буго лахI чIегIераб гьересилъун. Щайин абуни кIиябго рахъ разияб бугин. Гьеб гуребги, рокьи ккаразул гIел бащадаб бугин кидаго, ян тIаде жубана Рамзан Къадыровас.
ТIоцересел макъалаби къватIире риччан рукIана «Новая газетаялъ» апрель моцIалда. Журналистаз абулаан, ясалъе бокьун гьечIин росасе ине. Аммаила гьелъул эбел-эмен разиял ругин. Гьезда тIадецуй гьабунин Чачаназул тIадтараз.
Республикаялъул хIакимзабаз гьеб хабар нахъ чIвана. Дагьалъ цебе Луизал росуцояз «Новая газетаялъул» редакциялдехун руссун, гьарана Чачан республикаялъул бетIерасде нужеца лъазаби, Луизаги гьелъул улбулги гьеб ригьиналде данде чIун ругин. Луизал цо абурав васги вугин.
Луизал гьалмагъзабаз къасд гьабуна гьеб информация социалиял сайтазда загьираризе, амма форумазул модератораз гьезул комментариял тIагIинарулаанин.
Гьалкъояз журналистаз ракIалде щвезабулеб буго гьадинал хIужа. 2010 соналда Рамзан Къадыровас официалияб къагIидаялъ гьукъана бахIарал рикъи. 2012 соналда гьукъун руго балугълъиялде рахинчIел ясал росасе ячине. Амма гьаб нухалъ живго Къадыровас хвезабуна жиндирго амру.
Нажуд Гучиговасийн абулеб букIана жинда лъалин Къадировасул амру, ва жиндир хиял гьечIин гьеб къанун хвезабизе. «Дир йиго лъади, ва дие гьей йокьула. Дие кIиабилей лъади къваригIун гьечIо», - ян лъазабуна гьес мухбирзабазде май моцIалъул авалалда.
Амма хадуб букIараб Чачан республикаялъул хIукуматалъул данделъиялда Рамзан Къадировас абуна, бертин букIине бугин ва жинца Луизал гIага-божаразухъе жиндирго вакил витIанин. Гьес дурус гьабунин – улбулги ясги разиял ругин абун. «Гьелдалъун абизе бегьула Луиза росасе хIалица кьолей йигин», - абулеб буго Милашиница.
ХIукуматалъул рехсараб данделъиялда Рамзан Къадыровас бакалъулал журналистал кутакалда какун, хIалтIудаса эркен гьавуна басмаялъул министр.
ДагIба бахъана федералияб даражаялде. Россиялъул президентасда цебе бугеб инсанасул ихтиярал цIунулеб Шураялъул бетIер Михаил Федоровас Генералияб прокуротуроялдехун вуссун, ахIи бана Луизал ихтиярал цIуне ян абун. Гьадинабго ахIи бана президентасда цеве вугев лъимералъул ихтиярал цIунулев Павел Астаховасде цIар арай журналист Елена Масюкицаги.
Астаховас абуна – жинца хIалица лъилниги ихтиярал цIунулев хъулухъчи гурин. Гьеб гьесул калам журналистаз какун хадусала, гьес лъазабуна жиндир хиял бугин гьаб гIагардисеб заманалда Чачан республикаялде сапар бухьизе.
