Human Rights Watch абулеб инсанасул ихтиярал цIунулеб халкъаздагьоркьосеб коалициялъ ГьатIан къоялъ СагIудиязул ГIарабиялъ бетIерлъи гьабулеб коалициялде гIунтIизабуна Йеменалда шиитазул къеркьохъаназде данде кассетиял бомбаби хIалтIизариялъул гIайиб. Загьирабураб лъазабиялда абун буго гьеб хIужаялъе нугIлъи гьабулеб бугин суратазги, видеохъвай-хъвагIаязги, цогидал документазги. Гьединал бомбаби рехулаанин гIадатиял гIадамаз гIумру гьабулел бакIаздеа аскIоб ва гьелдалъун гIайиб гьечIел гIадамазе хIинкъи щолеб бугин. СагIудиязул ГIарабиялъ гьеб гIайиб нахъ чIвалеб буго.
Кассетиял бомбаби хIалтIизари гьукъураб буго 2008 соналда 116 улкаялъ гьабураб къотIиялдалъун. Гьеб къотIиялъул сияхIалда я СагIудиязул ГIарабия, я гьелъул коалициялъул улкаби гьечIо.