Америкалъул аскарияз лъазабуна жидеца цIех-рех гьабулеб бугин Сириялъул Алеппо вилаяталда гьабураб гьужумалъул хIасилалда 52 ракълилав инсан чIваялъул хIужаялъул. Гьеб информация загьирабун букIана КIудияб Британиялда бугеб Сириялъул инсанасул ихтиярал цIунулеб къукъаялъ.
Гъозул баяналда рекъон балагь ккана тIоцебесеб маялда гъалатIалдалъун. Жеги 13 чи араб бакI лъачIого камунин. Цолъарал Штатазул къуватаз ва халкъаздагьоркьосеб коалициялъ гьадинал гьавадул гьужумал щибаб къоялъ гьарулел руго террористикияблъун рикIкIунеб «Исламияб пачалихъилан» абулеб багъа-бачариялъул къеркьохъаназ чIей гьабулел бакIазде.
Амма гьел гьужумазул хIасилалда ракIалдаго гьечIого гIадатиял гIадамалги чIвалел руго. ТIоцебесеб май щвелалде 66 чи чIван вуго. ЧIварал экстремистазул къадар кIиазаргоялде бахунеб буго, ян лъазабулеб буго Сириялъул инсанасул ихтиярал цIунулез.