Гьес жиндиго цадахъ хIалтIулев чи вухиялъул щаклъи буго цIех-рехалъул идарабазул хIалттIухъабазул.
Дербенталъул жанисел ишазул бутIаялъул нухмалъулев Аваев Левадинида тIад гьес хъулухъалдаса букIине кколелдаса цIикIкIун пайда босиялда хурхун такъсиргьабиялъул иш рагьун буго. Гьеб рагьиялъе аслияб гIиллалъун ккун буго гъоркьисала соналъул ноябралда гьес жиндаго цадахъ хIалтIулев майор Ибрагьимов Тельман вухиялда щаклъи букIин. Гьедин бицана «Эркенлъи» радиоялъе Ибрагьимовасул адвокатас. Гьес лъазабуна гьеб иш рагьи тадсикъ гьабулеб документалги ругилан. ЦIех-рехалъул идараялъ гьеб ишалда хурхун жеги кинаб букIаниги баян кьолеб гьечIо.
Вухарав полициялъулас Дагъистаналъул прокуратураялде ва гIайиб ккарал полициялъулазе гIадлу гьабулеб жанисел ишазул министерлъиялъул бутIаялдеги гьеб лъугьа- бахъиналда хурхун гIарза битIун букIун буго. Гьелда хъваралда рекъон полициялъулаз Дербенталда ккун рукIун руго къануналде дандекколарел валютаялъул бича-хисиял гьарулел чагIи.
Аваев Левадиница Ибрагьимов Тельман ахIун вуго жиндихъего, гьел чагIи кинаб административияб тамихIалде цIазе бегьулелилан цIехезе. Гьев вукIун вуго административиял такъсирал гьаруразе тамихI гьабиялда хадуб халкколеб полициялъул бутIаялъул нухмалъулев. 2009 соналдаса нахъе къануналда гьеб валюта бича-хисиялда хурхун тамихI бихьизабураб бутIа хвезабун бугин гьел тамихIалде цойги кинал бутIабазда рекъон цIазе бегьулебали лъазабилин абун буго Ибрагьимовас.
Гьеб абурабго гъул-гъудизе лъугьанила Аваев, разигьечIолъи бихьизабунила. Хадуб гьеб суалги мухIкан гьабун жиндир хIалтIухъан гьесде кIалъараб мехалда Аваев гьесде ахIдон хъубал жал рикIкIине лъугьанилан хъвалеб буго Ибрагьимов Тельманица. Гьеб хIехьезе кIвечIого гьесда бадирчIваял гьаризе арав Ибрагьимовасда Аваевас ботIролъ жо кьабун буго. Гьелъул хIасилалда майорасул гIадалнахуе жагъаллъи ккун букIун буго.
Ибрагьимов Тельманил адвокат Велибеков Мурадица «Эркенлъи» радиоялъулгун букIараб гара-чIвариялда бицана цIех-рехчагIаз гьеб лъугьа-бахъиналда хурхун такъсиргьабиялъул иш рагьизе гIурал гIиллаби рукIаниги цIех-рехалъул идарабаз гьеб кIваралъ нахъбахъулеб букIанилан. Гьединго Мурадица баян гьабуна гьев Левадин Аваевасда тIасан хIалтIухъабазул цере-цереги чанги гIарзал рукIанилан.
Мурад Велибегов: «Нилъер республикаялда тIадегIанаал хъулухъазда ругел жанисел ишазул хIалтIухъабазда хурхун такъсиргьабиялъул ишал киданиги заманалда рагьуларо. Кидаго халатбахъинабула хасал идараабаз гьеб иш, щиб гьабунги жидерго чи гьелдаса ворчIизе нухал ралагьулел рукIуна гьел.
Гьаб нухалдаги Аваевас кьабун хадуб Ибрагьимовасул сахлъиялъе зарал ккун букIин бихьулеб букIаниги, лъикI заманалъ кватIизабуна гьез хасаб экспертиза тIобитIи. Гьеб гурониги Аваевасул хIалтIулеб бакIалда букIун буго видеорегистратор. Гьелъул записалда бихьулеб буго гьес Ибрагьимовасда кьабараб куц, цохIо гьеб букIаниги гIолаан такъсиргьабиялъул иш рагьизе.
Гьеб видео цин бацIцIине лъугьун рукIун руго полициялъулал. Хадурги гIайиб ккарал полициялъулазе гIадлу гьабулеб жанисел ишазул министерлъиялъул бутIаялъул вакилзабиги рачIун гьеб видео цIигьабуна. Гьелъиеги гIезегIан заман къваригIуна, палхIасил Аваевасда тIад иш рагьиялъе гIезегIан квалквал гIезегIан рукIана. Гьеб гурониги Левадин Аваев вуго гьекъезе бокьулев чи, мехтараб мехалдаги бокьараб жо гьабула гьес. ГIадамазде ахIдола, вагъула.
Гьесда тIасан чанги рукIана гIарзалги, такъсиргьабиялъул иш рагьейин гьесда тIадилан тIалаб гьабурал кагъталги. Масала, гьебго полициялъул бутIаялда хIалтIулев цойги чиясги жинда кьабанин гьесилан абун гIарз хъван букIана, гьединго цо такъсиргьабиялда щаклъи букIун ккурай чIужу гIаданги гьес цIакъ инжит гьаюн йиго, хIинкъаби кьун руго гьелъие, гьелъги хъван букIана гIарза, амма Ибрагьимовасул гIарзалда рекъон гурони иш рагьичIо щай гурелъул гьесухъ далил букIана - видеозапись».
Дагъистаналъул жанисел ишазул министерлъиялъул пресс-хъулухъалъги Аваевасда тIад такъсиргьабиялъул иш рагьиялда хурхун кинабгIаги баян кьолеб гьечIо. Гьезул рагIабазда рекъон гьев вукIарабго бакIалда жиндирго хъулухъалда хIалтIилев вуго гьаб сагIат.
Гьединго гьал къоязда жанисел ишазул министерлъиялъ баян гьабуна Гумбет мухъалъул полициялъул бетIер хъулухъалдаса вахъун вугилан. МахIачхъалаялъул росдал магIишаталъул техникум лъугIанин абураб гьесул диплом гьересияб батанила, гьеб гурониги хIалтIулъ чанги гъалатIалги риччан ругин гьесилан лъазабулеб буго гьез. Щал гъалатIали мухIкан гьабулеб гьечIо.
