ЦIех-рехалъул идараялъ гIайиб гIунтIизабуна оппозицияв политик Борис Немцов чIваялъул такъсирияб ишалда хурхун тIадеги кIиго чиясде.
Тамерлан Эскерхановасде гIайиб гIунтIизабулеб буго такъсир гьабиялъе кумек гьабиялъул, ХIамзат Бахаевасде – чи чIваялъулги ва къануналде данде кколареб къагIидаялда ярагъ жиндихъ букIиналъулги.
Цебе гIайибал гIунтIизарун рукIана Заур Дадаевасдеги Анзор Губашевасдеги.
Борис Немцов чIваялда хурхун аресталде гъоркье восун вуго кинавгIаги щуго чи. Щуабилев кколев вуго Шадид Губашев. Гьесде гIайиб гIунтIизабизе бегьула дагьалъ хадуб.
«Север» абураб Жанисел ишазул министерлъиялъул рагъул къуватазул чачаназул батальоналъул нухмалъулев хисулевлъун вукIарав Заур Дадаев тIоцеве мукIурлъун вукIана Немцов чIваялъе. Амма хадуб гьес инкар гьабуна жиндирго рагIабаздаса. Цебесеб анкьалда инсанасул ихтиярал цIунулезда гьес лъазабуна жиндие гIазаб кьеялъул хIакъалъулъ.