Гьал къоязда Гъизляр мухъалъул Шаумян росулъа, изнуг гьечIого яргъидгIуцIаразе кумек гьабиялъул, наркотикал ва ярагъ цIуниялъул гIайиб гIунтIизабулев вукIарав МухIамадов Имангъазалие диваналъ 7 сон кьун буго. Гьесул адвокаталъ диваналъул хIукму мекъаб бугин рикIкIунеб буго, ва гьелда тIасан жиндица гIарза хъвазе бугин лъазабулеб буго. Жийго гьей адвокаталда тIасанги, гьелъ диваналда гIадлу хвезабунин, гьечIел гIайибал чIванин низам цIунулездайиланги абун, диванчияс гIарза хъван буго.
Гъизляралъул диваналъ 11 марталда Имангъазали МухIамадов наркотикал ва изну гьечIого ярагъ цIуниялъе, гьединго экстремистазе кумек гьабиялъе гIайибияв вугинги рикIкIун 7 соналъ туснахъ гьавизе хIукму къотIана. Гьесул адвокат Елена Денисенко диваналъул хIукмуялда рази гьечIо. Гьелъ рикIкIунеб буго диваналъ МухIамадов гIайибияв вукIин чIезабун бажаричIин, диванги къанунги хвезабун унеб букIанилан.
2014 соналъул июнь моцIалда Гъизляр мухъалда хасаб операция тIобитIулеб мехалда низам цIунулез чIезабун буго Имангъазали МухIамадовасул автомобиль. Гьениб чIухь балаго изну гьечIеб таманчаги батун буго, гьелдаса хадуб гьесул рокъоб чIухь балаго гьенибги цойги таманчагун гулбиги, наркотикалги ратанин лъазабулеб букIана къуваталъул идарабаз. Гьелдаса хадув жанив тIамун вугев МухIамадовасде гьев изну гьечIого яргъидгIуцIаразулгун хурхен бугев чи вугин абураб гIайибги гIунтIизабун буго. Гьес жив экстремистазулгун хурхен бугев чи гурин, наркотикалги жиндие полициялъулаз жидецаго рехханин абураб мехалда гьев квешго вухунги вукIун вуго туснахъалда, амма гьесул адвокаталъ абухъе гьев вухиялъул хIужаги, гьелъие ругел далилалги диваналъ хIисабалде росун гьечIо. Гьединго диваналъ гIинго тIамун гьечIо Имангъазали МухIамадов наркоман гуревлъи бихьизабулеб экспертизаялъул баяназухъги.
Диваналъул ахирисеб данделъиялдаги ахирисеб кIалъай гьабизе рес кьураб мехалдаги МухIамадов Имангъазали изну гьечIого ярагъ цIуниялъе мукIурлъун вуго, хутIарал жиндиде гIунтIизарулел гIайибал кьучIгьечIел ругин лъазабун буго гьес. Амма диванчияс гьесул рагIабиги, жиндица данделъиялда рихьизарурал Имангъазалида гIайиб гьечIолъи чIезабулел документалги хIисабалдего росичIила, данделъи лъугIизегIан жиндиде ахIделев вукIанила гьевилан бицана «Экренлъи» радиоялъулгун букIараб гара-чIвариялда адвокат Елена Денисенкоца.
Елена Денисенко: «Диваналъ дир гIарзаялъухъ, тIалабазухъ яги дица гьенир рихьизарурал цониги документазухъ халго гьабичIого. Щибниги хIисабалдеги босичIого, хъатамасан нахъчIвана гьел. Амма прокурорасул щибаб хIухьел кколеб букIанин диванчиясин абураб гIадаб ахIвал-хIал букIана гьениб. Щиб жо гьес абуниги прокурорасда разилъулев вукIана гьев. Гьес хIисабалдего босичIо Имангъазали экстермистазулгун бухьен бугев ва наркотиказда хурхарав чи вукIин диваналъ чIезабун гьечIолъи, гьелъие нугIлъи гьабулеб цониги далил гьечIолъи. Гьелда тIадеги гьесул рокъоб чIухь балеб мехалда нугIзаллъун рукIарал чагIи гьел низам цIунулезул чагIи рукIин дица баян гьабиги рикIкIинего рикIкIинчIо гьес. Дихъ документал рукIана гьел чагIи МухIамадовасулго гIадаб лъабгониги ишалъулъ нугIзаллъун рукIин рихьизарураб. Дица гьедин абураб мехалда гьел гIадамазул ихтияр бугила бокьараб бакIалда нугIлъи гьабизейиланги абун чIана диванчи. Гьеб киналдего тIаде дица диваналда цере лъуна Имангъазали туснахъалда вухи бихьизабулел документалги, гьесул сураталги. Амма гьебги хIисабалде босичIо диванчияс».
Гьединго Денисенкоца бицана гьебщинаб жоялдаса хадуб жиндица диванчиясда тIасан гIарза хъваниги бегьулеб мехалдайила, гьес жиндида тIасан адвокатазул палатаялде кIудияб гIарза хъван бугилан.
Елена Денисенко: «Гьес дун гьоркьое унеб Краснодар мухъалъул адвокатазул палатаялде кагъат хъван буго дида диваналъул данделъиялда йикIа-яхъине лъалеб гьечIила, дун гьений ахIделей йикIанила, дица диванчиясул адаб гьабулеб букIинчIиланги абун. Дун цохIониги данделъиялда гьаракь борхун кIалъачIо, дун къанунги хIалтIул къагIидабиги лъаларей чIужу гуро, бегьулареб жо щибниги гьабичIо дица. Амма диванчийин абуни живго вукIана битIахъе кквезе кIоларого, бегьулеб жо букIарабани доба диван гьабулеб бакIалдаго дир гьурмалъ жо щвезабилаан гьес. Гьев вукIана диде ахIделевги, гьеб киналъулго запись гьабун буго дица диктофоналда. Гьев лъугьун вукIана дицайила гьеб ишалъул щибаб жо журналистазда бицунеб бугила, диде тIаде батIи-батIиял къватIисел улкабазул грантал щолел жамгIиял идарабаз тIадецуй гьабулеб бугила, гьез малъухъе хIалтIулей йигила дун. ГIаммаб къагIидаялъги дица диваналъул данделъиялда гIадлу хвезабулеб бугилан хъван буго гьес, жинцаго гьабунщинаб жо диде реххулев вуго».
Гьединго Денисенкоца бицана МухIамадовасул ишалда хурхун диваналъ гьабураб хIукмуялда разигьечIила жий, гьединлъидал гьелда тIасан Дагъистаналъул тIадегIанаб диваналде гIарзаги хъван бугила жиндицайилан.
Гьединго 12 марталда диваналъ кIиго сонги кьун туснахъ гьаюн йиго Гъизилюрт мухъалъул Кироваул росулъа Насибова ПатIиматги. Гьелде изну гьечIого яргъидгIуцIаразе кумек гьабулеб букIанин абураб гIайиб гIунтIизабулеб букIана хасал идарабаз. Гьезул баяназда рекъон 2014 соналъул августалдаса октябрь моцIалде щвезегIан гьелъ Гъизилюрталъулабин абулеб экстремистияб къокъаялъул гIахьалчагIи жиндирго рокъор Кироваулалда рахчун рукIун руго, квен-тIехалдалъунги хьезарулел рукIун руго гьел.
