Хамиз къоялдаса рузман къоялде Донбассалда рагъулаб конфликталъул зонаялда хун вуго Украиналъул лъабго солдат, лъукъун вуго анкьгояв.
Гьедин лъазабуна рузман къоялда гьениб операция гьабулел рагъулазул штабалъул вакил Андрей Лысенкоца улкаялъул информалатазе.
Гьесул рагIабазда рекъон, сепаратистаз кьвагьулеб букIун буго гIарадабаз ва хIалбихьун буго лъабго росдае гьужум гьабизе ва гьел киналго гьужумал нахъчIван руго. Лысенкоца гьединго лъазабуна, ахирал къоязда Донецк ва Луганск икълимазда кьвагьи дагьлъун бугин, амма сепаратистаз къуватал ракIарулел ругин ва рагъал унел рукIарал гIурхъабазда щиб кколеб бугебали баянал ракIарулел ругин.
Украиналъул хIукуматалъул рахъалъ ва сепаратистаз лъазабулеб буго рагъал унел рукIарал бакIаздаса, Минскаялъул къотIиял тIуразарун, рагъулаб бакIаб техника нахъегIан бачунеб бугин ва гьеб хIалтIи Европалда рекъон хIалтIиялда ва хIинкъигьечIолъи цIуниялда сверун идараялъул ай ОБСЕялъул тохаллъиялда гъоркь тIобитIулеб бугин.