2004 соналъул 26 декабралда Индиялъул океаналда букIараб кIудияб цунамиялъулги ва пасатаб ракь багъариялъул къурбанал ракIалде щвезарулел рукIана рузман къоялда Азиялъул улкабазда.
10 соналъ цебе ккараб тIабигIияб балагьалъул хIасилалда гIаммаб къагIидаялда хвана 230 азаргоялдаса 300 азаргоялде гIунтIун чи. Бищунго кIудияб балагь гьелъ щвезабуна Индонезиялде.
Гьенив хвана 150 азаргоялде гIунтIун чи. Индонезия рикIкIинчIого тIабигIияб балагьалъул асар щварал улкабазул сияхIалда буго гьединго Таиланд, Шри-Ланка, Мьянма, Малайзия ва цогидал.
Зарал ккана гьединго Африкаялъул Сомалиялъе ва Жанубияб Африкаялъул республикаялъе.