Ставрополь икълималъул Буденновск шагьаралда полициялъулаз ккуна инсанасул ихтиярал цIунулей хIаракатчIужу, солдатазул улбузул комитеталъул бетIер 73 сон барай Людмила Богатенкова.
Гьелде гIунтIизабулеб гIайиб – хIилла-макру гьаби. Гьелъул кумекчIужу Елена Герасимовалъ нижер радиоялъе лъазабуна, низам-цIунулез цин Богатенковалъул оффисалда чIухь бан, цинги гьей цIех-рехалъул изоляторалде жание тIамун йигоан.
Гьелдалъун цогидал хIаракатчагIи хIинкъизаризе бокьилаанин, лъазабуна Богатенковалъул ишцояз.
Ахирисел моцIазда Богатенковалъ цIех-рех гьабулаан Украиналъул машрикъалъул рахъалда Россиялъул аскариял чIваялъул хIужабазул.
Богатенкова гьединго ккола Президентасда цебе бугеб инсанасул ихтиярал цIуниялъул Шураялъул рагъулабгун-гражданияб комиссиялъул экспертлъун.