23 сентябралда Нью-Йоркалда байбихьулеб буго Цолъарал миллатазул гIуцIиялъул климат хисиялда хурхараб саммит. Гьелда гIахьаллъизе руго 120 пачалихъалъул вакилзаби.
Гьеб данделъиялда гьоркьор лъезе руго климат хисиялъе гIиллалъун кколел атмосфераялде риччалел газазул даража гIодобе ккезабиялда сверун халкъазда гьоркьосеб къотIи-къай хIадуриялъул суалал.
Гьединаб къотIи-къай рахъаз гъулбасизе ккола 2015 соналъул ахиралда.
ГьатIан къоялда Нью-Йоркалда тIобитIана аза-азар чи гIахьаллъараб марш. Гьелъул гIахьалчагIаз улкабазул лидерал ахIана климат хисиялде данде нахъ тIамичIого тадбирал тIоритIи.
Маршалъул гIахьалчагIазда гъорлъ рукIана Цолъарал миллатазул гIуцIиялъул генералияв секретарь Пан Ки Мун, Цолъарал Штатазул вукIарав вице-премьер Альберт Гор, Нью Йоркалъул мэр Билл де Блазио, актер Леонардо ди Каприо.
Гьединалго акцияби гьатIан къоялда тIоритIун руго гьединго Европаялъул, Австралиялъул, Азиялъул цо-цо шагьаразда. Лондоналда гьединаб маршалда гIахьаллъун вуго 40 азарго чи.