Бесланалда байбихьун руго анцIго сон цебе букIараб трагедиялъул къурбанал ракIалде щвезариялъул тадбирал. 2004 соналъул 1 сентябралда школа яргъидгIуцIараз гъоркьлъалие босиялъул ва хадуб хасал хъулухъаз гьужум гьабиялъул хIасилалда гьенив хун вукIана 334 чи, гьезулги бащдалдаса цIикIкIун рукIана школ-лъимал.
«РакIалде щвеялъул вахта» халат бахъине буго 51 сагIатгун 50 минутаялъ-гьедигIанаб заман бахъун букIана гъоркьлъалие росараз школалда. Гьеб заманаялъ школалъул чIвадазда ракун рукIине руго хIедул чирахъал. Цоги тадбираздаго цадахъ, метрономалъул гьаркьихъе гьенир цIализе руго бесланалъул трагедиялъул къурбаназул цIарал.
Гьел ракIалде щвезаризе руго Владикавказалдаги, бесланалъул лъималазе лъураб мемориалалда аскIоб Москваялдаги, Петербургалдаги, Италиялъул Кастельново-ди-Сотто шагьаралдаги. Гьедин лъазабулеб буго ИТАР-ТАССалъ.
Гьеб балагьаб лъугьа-бахъиналъул ритIухъаб цIех-рех гьанжеги гьабун гьечIо. Бесланалъулаз рикIкIунеб буго тIалъиялъе къваригIун бугин гьеб трагедия кIочене тезейин. 1 сентябралда рагIалде бахъуна гьеб трагедия ккезе биччарал низам цIунулел жавабчилъиялде цIазе къануналъ бихьизабураб болжал.