Украиналъул премьер-министр Арсений Яценюкица лъазабуна гуманитарияб кумек гьезул улкаялъ халкъаздагьоркьосел къануназда рекъон ва БагIараб Хъанчалъул Халкъаздагьоркьосеб комитеталъухъа гурони къабул гьабизе бегьуларн.
Гьесул рагIабазда рекъон, улкаялда жиндаго кIолеб буго машрикъалъул рахъалда ругел гIадамал хIажаталдалъун хьезаризе. Яценюкица абуна Киевалъ гьеб регионалде гьанжеялде гуманитарияб кумекалъул 270 тонна битIун бугилан.
Гьелдаса цебе Россиялъул къватIисел ишазул министр Сергей Лавровас лъазабун букIана Украиналъул къватIисел ишазул идараялдасан жидехъе бачIараб лъазабиялда рекъон, Киев хIадураб бугин улкаялъул машрикъалъул рахъалде Россиялъ битIулеб гуманиятарияб кумек къабул гьабизе ва гьеб суал Киевгун дандбан бугин.
Россиялъ тIадкIалъай гьечIого къабул гьарун руго Украиналъ чIезарурал шартIал, гьездаго гьоркьоб колонна ине бугеб нухги.
Талат къоялъул радал Москваялда гъоркьехун бугеб Наро-Фоминск абулеб бакIалдаса гуманитарияб кумекалъул къайи тIад бугеб автомашиназул колоннаялъ нух босун буго Луганскалде. Гьенир гIадамал кIиабилеб анкьалъ хутIулел руго канлъиги лъимги гьечIого. Гьенир рагъал унел рукIиналъ хIалтIулел гьечIо тукаби, дараби ричулел бакIал ва гьечIо гьениб телефоназул бухьен.