Жаватханов Денга кколаан Гъизилюрт шагьаралда бугеб адвокатазул коллегиялъул хIалтIухъан. Гьев викъун иналъе гIилла жеги лъалеб гьечIо. Цадахъ хIалтIулез бицунелда рекъон гьев викъун ине гIадал хIужаби гьесул хIаракатчилъиялъулъ рукIун гьечIо. Кидаго сабурав, гIодоввичарав чи вукIанин бицунеб буго гьез. Адвокатазул коллегиялде хIалтIизе вачIун гьес бан букIун буго щуго сон. Гьеб заманада жаниб гьесдехун кIвар кьезе ккараб гIадаб криминалияб лъугьа-бахъинги букIун гьечIо гьес цIех рех гьабураб.
Гьедин бицана «Эркенлъи» радиоялъе гьевгун цадахъ цо кабинеталда хIалтIулев вукIарав Ражабов Арсеница. Ункъабилеб августалда сагIат кIиго тIубаралдаса гьесул телефоналде ахIун унеб букIун гьечIо. Къасиялде гьесухъе щалали лъаларел гIадамаз ахIун бачIун буго Гъизилюрталъул Гагаринил цIар лъураб къотIнов цо чи анин хIал гьабун автомобилалда жанив рекIинавун ва гьес чIечIого ахIулеб букIанин Арсенида бицейин хехго жив вачун унев вугилан. Амма гьев чи щив вукIаравли гьасда бицун гьечIо. Хадуб Денга гIумру гьабун вукIараб Нечаевка росулъ бугеб рокъове гьев тIад вуссинчIилъи лъан хадуб бичIчIун буго Арсенида викъун арав чи Денга вукIин.
Арсеница гIайиб гъвел балеб буго полициялъул хIалтIухъабазде Денга викъун вугеблъи лъалеб букIаниги гьез кинал рукIаниги рукIине кколел тадбирал гьаричIилан абулеб буго гьес.
Ражабов Арсен: «Полициялъул хIалтIухъаби лъугьа-бахъин ккараб бакIалде щун хадуб гьенир аскIор рукIарал гIадамазул лъилгунниги кIалъа-бацайги гьабичIого чIун руго гьеб жидер хIалтIи гурин, гьеб бугин цIех-рехалъул комитеталъ гьабизе кколеб ишилан багьанаги батун. Жаватханов викъун унев вихьарал чагIаз бицана жидеца гьеб къоялъго кIиго нухалъниги ахIанин полициялде, амма жидеда лъалин гьебиланги абун тIаса рихьизарунин жал».
«Эркенлъи» радиоялъ гьединго бухьен гьабуна Жаватханов Денгал вац СагIидилгунги. Вац викъун иналъе букIараб гIилла лъалеб гьечIо гьесдаги. Гьесул хIалтIулаб хIаракатчилъи сабаблъун гьабураб иш батулин гьебилан буго гьесул пикру. Ахирисеб нухалъ вацгун гьев кIалъан вуго гьев викъун иналде сагIаталъ цеве гIадин. Гьел кIиялго дандчIвазе кколел рукIун руго гьеб къоялъ, СагIидил дандеккун гьечIо гьев хъулухъ гьабун вугеб Ахты мухъалдаса гьениве вачIине. Хадуб лъан буго вац викъун ун вукIин. Жаватханов СагIидил щаклъи буго гьеб низам цIунулез гьабураб иш букIиналде.
Жаватханов СагIид: «Гьеб бихьарал чагIаз бицана дида, полициялъул хIалтIухъаби Денга викъун араб бакIалдеги рачIун гьесул хIатIидаса бортараб хьит, гьесул тIагъур ва автомобилалъул гъурараб цIерги нахъе бищун анин гьенисайилан. Гьеб киналъго щаклъи цIикIкIинабулеб буго полициялъулазда гьеб кинабго гьабизехъин букIин лъалеб букIанилан».
Жаватханов Денга викъун иналъе гIилла лъазе тIалаб гьабун гьесул гIага-баожараз ва гьев лъалел рукIаразул 200 саги цIикIкIун чияс митинг тIобитIун букIана щуабилеб августалъ Гъизилюрт шагьаралъул жанисел ишазул минаялде цебе.
