Июлалъул 14 абилеб къоялъ низам цIуниялъул идараялъул хIалтIухъабаз ришват босулаго ккун вуго Тарум мухъалъул прокурорасул кумекчи Степан Свиридов.
Ахираб лъагIалида жаниб гIемерал муниципалиял гIуцIабазул, шагьаразул, мухъазул бутIрул, лъайкьеялъул, сахлъи цIуниялъул хIалтIухъаби, хIатта, низамцIуниялъул хIалтIухъабицин ришват босиялъул хIужаби сабаблъун жанир тIамулел руго.
Дагъистаналъул жамгIияталъ лъикI къабул гьабулеб бугила тIалъиялъ ришватаздагун коррупциялда хурхун гьабулеб хIалтIуда , гьелдаго цадахъ дагъистаниял божулел гьечIила тIубанго гьеб унти кьолболъаго бахъун лъугIизабиялдайилан бицана «Эркенлъи» радиоялъе «Дагъистан» журналалъул бетIерав редактор МухIамад БисавгIалиевас Гьадинал баянал гьаруна гьес:
МухIамад БисавгIалиев: «Божизе кколев ватула дун гьелда, щай гурони пачалихъалъ гьабулелдаги гIадамаз гьабулелдаги божичIони кидаго иш цебе билълъунаро. РакIалъ божизе течIониги гIакълуялъ тIамула божизе. Щибун лъуниги щиб жанир, аслияб жо буго жанир лъей.
Гьава-бакъалъ тIамун жанир лъуниги, кин лъуниги. ГIемерисел такъсир гьабиялъухъ тамихI гьабулеб букIин лъан гьеб такъсир гьабичIого тезе рес буго.
Политикиял заказ бугониги кин бугониги аслияб жо буго гьел жанир лъей. Гьел сахлъи цIуниялъул, лъай кьеялъул, низам цIуниялъул хIалтIухъаби жанир лъей кутакалда лъикIаб иш буго, дун гьелдаса разиявги вуго».
Цогияб рахъалъ гьеб кколеб бугила политикияб заказилан бицана «Эхо Москвы Дагъистаналда» радиоялъул мухбир, ГIумаров МухIамадрасулица.
Цоял берал къанщун жалго толел ругила , цогиял жанир тIамулел ругилан бицана гьес. Жакъа президент вачIинегIан ришват босуларин абураб жо гьеб рогьо бараб гIадаб жо букIана. Ришват босуларелги цо-кIиго къо бухIарав чи вукIун ватила тIалъялдайилан абуна гьес. Ришватчилъи щибаб расул кьолболъ бугила нилъер гIадамазул.
Гьеб бидулъ босун бугила. Щибав чиясда Дагъистаналда кIиго гIелму лъазе кколила; цояб хIакъикъияб гIелму, цогидаб лъие кигIан кьелеб абураб гIелму. Нилъер халкъалъе бищун кIудияб балагь бугила гьебилан бицана «Эркенлъи» радиоялъе ГIумаров МухIамадрасулица.
Алиса АЛДАШЕВА
