МагIарулазул булбулилан жинда абулей Муи ХIасанова гьаюна 1930 соналъ Чохъ росулъ. Гьелъ жиндирго творчествоялъулаб нух байбихьана Дагъистаналъул кочIол ва кьурдул пачалихъияб ансамблялдасан.
Къокъаб заманалда гьений бищун лъикIай артисткалъун яхъарай Муица гIахьаллъи гьабуна 1957 соналъ Москваялда тIобитIулеб букIараб тIолгодунялалъул гIолилазулгун студентазул фестивалялда.
Гьениб СССРалъул культураялъул министерлъиялъул гIарцулаб каранда балеб игIланги щун букIана Муи ХIасановалъе. 1960 соналдаса нахъе Дагъистаналъул телевидениялъул ва радиоялъул хоралдаги хIалтIана гьей.
Берцинаб кочIоца гурониги, эркенаб, гIадатияб гIамал букIиналъги халкъалъе цIакъ йокьулаан Муи.
Гьелъул творчествоялъулъ хасаб бакI ккола Расул ХIамзатовасул кучIдуз. Расулица гьелъие хасгьабун хъван рукIана чанги кучIдул.
РСФСРалъул мустахIикъай артистка, Дагъистаналъул халкъияй артист Муи ХIасановалъе щун букIана ЦIадаса ХIамзатил цIаралда бугеб премияги, Гьудуллъиялъул орденги, ВатIаналъе гьабураб хъулухъалъухъ орденалги.