17 июлалъ рогьалил как базе унаго, Хунзахъ мухъалъул ГьоцIалъ росдал кIудияб мажгиталъул кIалтIа чIван вуго 32 сон барав Анасов ГIумар. Гьев ккола гIемер соназ ГьоцIалъ росдал бетIерлъун вукIарав Анасов МухIамадил вас. Росдал жамагIаталъ гьеб такъсир изну гьечIого яргъид гIуцIаразде тIамулеб буго.
Гьеб лъугьа-бахъиналъул хIакъалъулъ гьадин бицана ГьоцIалъ росулъа АхIмадова Раисатица:
АхIмадова Раисат: «Гьесда 18 борлъараб гуллил ругъун батун буго. Рогьалил как базе къватIиве вахъарав васасда рихьун руго тIурун унел маскIаби тIад хурал кIигоял. Мажгиталъул кIалтIе щведал, гьесда чIван рехарав ГIумар ватун вуго , гьес лъазабун буго гIадамазда».
ЧIварасул росуцояз бицухъе, ГIумар чанго соналъ хIалтIун вуго ХIнзахъ мухъалъул наркотиказда данде къеркьолеб идараялда. 7 соналдаса бан букIун буго гьев гьениса нахъе вилълъун.
Жиндие гьединаб, гIадамазул рокъове лъугьунев, чIухьал ралеб хIалтIи данде кколариланги абун ГIумарица гьеб хъулухъ тун бук1ун буго.
Ахирал саназ гьев боцIи-панз хьихьун магIишат гьабиялда ван вукIун вуго. ГьабсагIат росулъ гIемерал полициялъулал ракIарун ругин лъазабулеб буго росдал гIадамаз. Жиндр цIар рехсезе бокьичIес бицана гьеб росулъ хасал тадбирал тIоритIизе ургъунго гьабураб гIадаб чIвай бугиан абураб пикру.
Щайгурелъул, ахирал соназ росулъ гIемерлъун руго салафиязул нухдаса рилълъунезул къадар.
Гьединлъидал, зама-заманаялдаса тIарикъатчагIаздаги гьездаги гьоркьор дандеккунгутIаби рукIунилан абулеб буго г1адамаз.
Гьединго Эркенлъи радиоялъухъе щварал мухIканал гурел баяназда рекъон ГьоцIалъа ва аскIор бугеб Уздалросулъа чанго гIолохъанчи рохьилазул мухъилъги руго.
