Ираналъул къватIисел ишазул министр Жавад Зариф Венаялда дандчIвана Евроцолъиялъул къватIисел ишазда сверун идараялъул бетIер Кэтрин Эштонгун. Гьебги 20 июлалда Ираналда ва дунялалъул цебетIураб анлъго улкаялда гьоркьоб Тегераналъул атомияб программаялда сверун кIалъа-ралъаял байбихьилалде цебе.
Эштониял вакил Майкл Манница лъазабуна Венаялда кIалъа-ралъаязул атмосфера хIалтIулаб бугин. Гьесул рагIабазда рекъон, рахъал хIадурал руго киназего дандекколеб лъикIаб хIасил щвезегIан хIажатаб заманаялда кIалъа-ралъаял халат рахъинаризе.
Америка, Россия, Китай, Франция, Британия ва Алмания гIадинал улкабазе къваригIун буго Ираналъ жиндирго атомияб программа гьитIин гьабизе. Гьебги Тегераналъ атомияб ярагъ гьабулеб гьечIолъиялда жидерго ракI чIун букIинелъун. Ираналъ тIадечIей гьабулеб буго жидер атомияб программаялъул ракълилаб хасият букIиналда.